Tu mi âs freât

Plui che lâ jù pe rive, a Pieri Snait i plaseve il sgrisul di viodi il clopament de biciclete, il fren che di sigûr nol varès funzionât, il manuvri saldât stuart. Zontin ancje la ruede flape, il cerclon daûr sclavueç, la siele malsigure sul telâr. No content, al gjoldeve a sintî la cjadene che e scloteave, batint cuintri un carter rusin e consumât.
La rive a jere di chês tristis. Pendence impussibil, asfalt vecjo e malmetût, claps e fueis che a intrigavin il passaç. Cun di plui, no si viodeve nancje un splaç dret, indulà fermâsi. La sielte juste, al pensave Pieri, intant che al passave vie come une saete.
Cun dute probabilitât, nissun om al veve ancjemò frontade la rive come lui. Masse pericolôs, tant une probabil colade, cun sigure fracassine di vues, si scugnive metile in cont. Ma nol jere un probleme. Lui al jere il prin, e chest lu rinfuarçave, fasint passâ ogni pôre.
Dut un eletric, Pieri Snait al berlave, e al sintive la sô vôs pierdisi e rivocâsi tai creps de montagne. L’aiar cuintri i veve fat nassi dôs lagrimis, tant che ogni cuatri pedaladis al striçave i voi par viodi miôr. Ma ce schiadôr, ce velocist, ce pilote di avions! Lui cumò si sintive un missil, tant che la biciclete e someave cjapâ fûc.
Framieç chescj pinsîrs, cu la code dal voli al smicjave i boscs in bande ae strade, e i tornave intal cjâf il bielissim mont platât dentri: il spuç che si vongolave tes fueis, il martar che al cimiave daûr di une cise, il jeur che al saltave content. Ce biel…
No! Vonde! O ai di stâ concentrât. No pues fermâmi cumò! Al sarès un smac, une vergogne, un faliment! Al pensave Pieri, scjassant il cjâf, sperant cussì di parâ vie i ricuarts.
Il sghirat che al zuiave, il cierf, il cjavrûl, la bolp su la lidrîs di un arbul. Une maravee…
Vie! Vie dal cjâf, chescj pinsîrs! Aromai o soi lançât. No mi ferme nissun!
Dut al jere sucedût intun marilamp. Il fren nol veve funzionât e di bot Pieri Snait si jere cjatât par tiere, dongje de sô biciclete scuintiade. Al cjalave il bosc. Une ramace stuarte a someave la linie di une ridade: cuant che la Nature a clame, nol è nuie di fâ!
Ancje cheste volte, al veve pensât, tu mi âs freât.

di Massim Furlan

3 coments On Tu mi âs freât

  • E insome, no ise ore di vivi une avenutre cun snait? Anzi, cun Snait, maiuscul, tal sens di vivile cun Pieri Snait! Cemût no cognosseis che batecul di Pieri Snait? Altri che avengers, lui al è Oltre. E al è propite il câs di lâ a viodi ce che al cumbini, in cheste conte dal nestri Massim Furlan, che e messede aventure e lessic, e a va svelte… svelte… sveltisssssssbodobom!

  • Pieri Snait lu viôt come chei pionîrs di une volte: Chel che si bute ju da tor francese par provâ il pare coladis, chel che al vûl svolâ cul avion a pedai, e vie indenant, la sfide di Pieri purtrop je stade paiade mâl, ma o soi sigûr che chel di dopo al’ à vût bon risultât, lis grandis scuviertis purtrop domandin cussi. Compliments a Massim cal inbraghe simpri contis a sdrondenâ la sedentarietât de ment umane. Lussian

  • Il finâl di Pieri Snait al sarà chel che al sarà, ma cui ti gjavial chei minuts di adrenaline intense, pal fat di sintìnti menaçât o di une sconfite o ben ancje di une vitorie.
    La conte e je biele e interessante parcè che ven contornade cun dute chê nature che nus presente il bosc.

Scrîf un coment

This site uses Akismet to reduce spam. Learn how your comment data is processed.

Pît di Pagjine dal sît