Insome… Pauli al jere jentrât tai ufizis dal INPS par podê finalmentri ritirâ il modul che
al varès compilât cjase par aviâ il procediment pe pension ma lui nol crodeve ai siei voi… dentri al jere dut un davoi…
a jerin rivâts chei cul gjilet celestin a fruçâ sù dut… i impleâts e lis impleadis a jerin scjampâts
di buride e i faldons a brusavin… tante cjarte e brusave…
Chei vandai dal gjilet celestin a volevin cambiâ il mont… lôr a jerin ducj zovins e no saressin mai rivâts
a la pension… cussì si sfogavin par fâ in mût che nissun altri nol rivàs a gjoldile… a brusavin ducj i modui…
“Puar me” al pensave Pauli… “dute une vite di lavôr e chescj ca…”
Nol veve finît di pensâ che i jere rivât intor un vâs di oton tirât di un bintar in passamontagna…
si sintì un CRACK… e jere la capadocie di puar Pauli che si rompeve…
Biât om… al veve lavorât dute une vite par rivâ in chel ufici al apuntament cul destin…
Cui sa nie che intal avignî no capitedin pardabon chestis robis…
jo le viôt grivie…
di Checo Tam
#786
4 comments On La pension
O stin inmò mandant vie i dadui a ducj i contecurtârs e a scomencin a rivâ za i prins regâi par Contecurte! E cui podevial jessi, dopo la conte dal Ostîr, a mandâ un regâl se no il fidât Famei Checo Tam. I jere capitade une butade migo di ridi, la viodês te imagjine. E lui al à tirade fûr une contute curtissime, che sperin che non sedi profetiche, e che e je une vore atuâl. Se seis dongje de pension… al è scuasi miôr che no la leieis! 😀
I N … PS no varès mai pensât che cheste casse di sparagn a benefici de vecjaie e rivàs a clopâ in chest mût, je che adiriture a à butât vie bêçs a finanziâ une vuere in timps lontans Il Checo al à sunât un cantin che al fâs pensa parsore, sperin no cjati puêst le so prevision. Brâf il Checo a meti in plat cun cuatri riis un problem di sêris pinsîrs . Lussian
BEâT CHEI CHE A ÀN BIELZÀ LA PENSION!!! JO NO I RIVARAI MAI…
FIRMâT: IL BON FAMEI
Pingback: Bon Complean Contecurte! | Contecurte ()