La mê prime conte

Mi visi come che al fos vuê. Al jere za timp che mi vevin fevelât di une ostarie che a vevin viert cualchi an indaûr. Di une bande il desideri di lâ al jere intens e vivarôs, ma di chê altre, un sbisighin di sudizion mi disconseave, e jo tal mieç mi dibatevi come un dordel. Ae fin ur disei baste ai doi conseîrs e inforcjant une biciclete co cjatai tal curtîl o cjapai la prime strade che mi vignì aduès.
Dulinvie o leievi segnalazions di ogni fate, ma lis dôs ruedis mi puartavin indevant come s’o ves colocât un navigadôr sul manuvri, chest mi menave jù viers la basse furlane: – Diu, o disei, saraio su la buine strade?
Passât Udin o scomençai a viodi dai cartei che mi siguravin ch’o jeri su la vie juste, fintremai che intune rive jù e cence podê frenâ o cjapai une curve masse di corse e… mi cjatai tun fossâl. Alçant i voi o viodei un cartel cuntunescrite che al diseve:
Mi soi sistemât ae buine disintmi: – di pocjis peraulis, benon, al è il sît just, za che no mi plâs cjacarâ dibant. – Un zovin che al passave in motorin mi disè: – Che al viodi che cheste e je une ostarie virtuâl, dome si pues jentrâ cul ordenadôr, se al vûl bevi un bon tai bisugne lâ te frascje di Carli.
Par fortune su la puarte o viodei la buse des letaris e li o introdusei la buste cul gnoscrit, podopo, come che la biciclete si jere scuintiade e Buenos Aires e jere masse lontane, o tornai a cjase cjaminant,
Fintremai che une buinore,ai 23 di Mai dal 2012, la mê prime conte e fo publicade.

di Galliano di Buenos Aires
#785

2 comments On La mê prime conte

  • O stin mandant, un pôc a la volte, i invîts cui dadui par fâ un regâl a Contecurte, e a son za rivâts ancje i prins regâi, che in setemane o podarês za scomençâ a lei.
    Se no vês ricevût la vuestre butade di daui, nuie pôre, in setemane al rive dut.
    Ma cualchidun, che al cirive di sghindâ la sfide, al à pensât ben di fâ un regâl ancjemò prime che lu si domandi a la nestre ostarie. E cui podevial jessi se no Galliano, colone insostituibile dal nestri locâl! Di cuant? Lu scuvierzeis leint cheste sô ironiche conte!

  • Altri che tom ,tom o navigatôr satelitâr le viere biciclete e saveve indula che si bef ben in Friûl, ancje se no je stade graceose di gjavalu di siele in chel mûd, ma Galiano no se à cjapade parcè veve capît che chel al jere il puest just. Une biele idee di ripescja vieris contis par chei che son vignuts dopo come tal gno câs, graçeant chel che mi à strisinât dentri che di non cumbine Nello Malisano. Compliments a Galiano pe riassunzion cussi ben metude al jentra in contecurte, e chel biel scrivi furlan dut di inparà almancul di bande me. Lussian

Leave a reply:

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît