Nadâl doimiledisevot

 

Ator a jerin presints il cidinôr e la Lûs.
E tal ajar si sintive fuart l’Amôr. L’om cence vite al veve sierâts i voi e cence bati dal cûr. Alore il Creatôr ch’al cognosseve il polvar, si metè dongje e di flanc in zenoglon, al slargjà il so mantel di sede e tirât dongje il so Spirit al soflà tes busis dal nâs une soflade di vite e l’om al deventà une creature vivente.
L’om tal sveâsi, alçâts i voi, al viodè la Lûs, ta lis mans al sintî il cjalt e come s’al savès ce fâ al tocjà ben planc lis palpieris, al misurà il çerneli e cul dêt al sbrissà sui lavrîs, podopo al partà lis mans al pet par sintî movisi il cuarp, al sintì il ajar jentrâ tal nâs par penetrâ tal profont di sè plui voltis. Fermde la sorprêse si voltà bande il Creatôr, al sintì il profum, la profonditât dal aiar e di dulà ch’al vignive l’Amôr. In chê ocasion al provà a movisi e al viodè la sô ombre movisi cun lui, po dopo, cul flât al sfuarzà e al viodè che i vistîts sflandorôs dal Creatôr si movevin, fasint cussì al imparà la volontât e al provà la vôs. Alore al cjapà coragjo e al domandà:
– A sint tal aiar l’Amôr jentrâ dentri di me e a sint il profum dai vistîts che tu puartis. Cemût fasio par cjatâti?
– A sint il calôr dal gno cuarp interpretâ la vite e ancje il respîr mi sburte a cjantâ. Cemût isal plui biel fevelâti?

La man ancjemò pesante par distudâ la svearine che a varès alçât par so cont il sunôr sibilant e concret ancje vuê di matine. Abàs la femine e meteve a puest plats e padielis scoltant la radio:
– âstu sintût che a Parigji la int par proteste si viest cul gjlèt zâl
– no
– a protestin pal carovita… migo come no talians, bogns dome di fevelâ…. A varessin di sedi plui atents al sociâl… no pegris come te.
– ai fat ancje io manifestazions cui sindacâts par zornadis in fabriche, se a tu ti visis”
– sì ma tant timp fa… Ti lassi un biliet pa la spese… si viodìn usgnòt… prepare alc di cene… al è di preparâ il presepi e picjâ lis lusutis fûr de puarte.

Al supermarcjât lis vôs di salût si misturavin ai numars dai conts e whatsapp, tante int a spindi e spandi dongje dal Nadâl come al marcjât a Mortean. Vignint fûr, une man vierte e nere a domandave un franc e cuntun euro si completave la relazion.
Tal cîl celest di vuê di matine si jere alçât un bocon di avion lassant dos riis blancjis e la gnot lis lusutis a varesin ripetût la sequence dal chip cu la pretese di dâ vite al scûr.

di Gaetan Cogôi

4 coments On Nadâl doimiledisevot

  • Podevie mancjâ une conte di Nadâl? No. E difat e je rivade. E e je une biele conte! Une conte che tache intune maniere e samee una naine fintremai masse religjose e dopo a va a finîloe di une altre bande, come noaltris che si dismenteìn dispes di ce bande che al sta il nadâl e si cjatìn dute di une altre bande. E alore vêle chi, une direzion metude intune conte dal nestri Gaetan Cogôi.
    Dute di lei!

  • Romantiche conte a inflocâ le setemane juste, e metint a bracet il timp di îr cun chel di vuê,indula che religjon e consumismo fasin fraje cence savê indula dai doi plombe le reson. Compliments a Gaetan

  • Biele conte a inflocâ il moment just, indula il timp di îr e chel di vuê si incuintrin tra religjon e consumismo metint in nô confusion.

  • Par fortune ,l’insumiâsi, simpri nus puarte fûr de reâl cuotidianitât, sint cussì o vin a nestre disposizion un tant di oris par gjoldi tal ben o tal mâl i nestris siums. Ma cuant che la crudêl svearine e sune, nus met subit a confront cun la nestre realtât.

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di Pagjine dal sît