O soi l’ultin di une grande cjadene. O viôt dute la storie dai miei vons. E jere za tacade prime ma o ai voie di ricuardâle fin dal moment che une sorte di ruie marine e jere deventade indipendente dal stadi di “assidie” ven a stâi une sorte di sac ancorât al fondâl.
La ruie, in milante agns, si trasformà intune sorte di cuardât e po in alc di simil ai ciclostomis, organisims marins cence gramulis che dopo, in altris gjenerazions, a saltarin fûr tant che mutazion vantazose. E vie, come pes che al nade tal mâr e al concuiste la tiere, planc a planc. La piel e devente plui penze e lis palostrighis si mudin in gjambis e in code. Ve l’anfibi che in cetancj agns si mude in retil. Ve il retil che in cetancj agns al mude in mamifar. Lis scaiis si trasformin in pêl. O sin a sessante milions di agns indaûr, aromai. Di une piçule pantiane a saltin fûr altris animâi e, tra di lôr, la simie che e piert la code e si alce deventant un dai antenâts dai oms. E jo o soi l’ultin di cheste cjadene scomençade miliart di agns indaûr. Cun me la cjadene e finìs. No ai voie di replicâmi. La mê vite no à plui sens. Mi butarai dal puint di Dogne.
Ma ve che, un moment prime, ju viôt ducj devant di me, in forme di spirt, in dutis lis mutazions… e mi mandin un messaç mentâl:
“No stâ a butâti jù… o vin fat cetante fature par deventâ te!”
di Checo Tam
#770
7 comments On L’ultin
E cuant che un al è il famei de Ostarie, i bastin pocjis, pocjissimis peraulis par meti dongje la fantascience e la sience, la conte sociâl cun chê dramatiche. E cuntune conte che e partìs milions e milions di agns fa e a rive fintremai uchì, in Friûl, sul puint di Dogne, vêlu il Checo che nus maravee. Leieile, che cheste contunte tant je curte, tante je perfete, te so brevitât.
Straordenarie!
Checo no dome tu, ma ducj cuancj nô e varessin di butasi ju dal puint di Dogne,pal fat che stin tradint lis fadiis che lôr a àn fat par fanus vivi ben disore chest globo, e che tant malamentri lu doprìn. Biele leture pe origjnalitât dai argomentz che il Checo al sa tirà fûr,e par chel furlan biel di imparà O ZONTI AUGURS DI BON NADAL E MIÔR AN A DUCJ I CONTECURTARS E SORESTANTS DE OSTARIE .LUSSIAN
Nissun si impense dai trilobitis 😓
Sì… jo
Pingback: La Briscule des Striis – la croniche | Contecurte ()
Pingback: La Briscule des Striis live | Contecurte ()