La setemane des missions

“Beâts vualtris zovins, che a vês timp di fâ dal ben”, al diseve San Filipuneri, il paradis nol è fat pai poltrons.”
Cussì a sîs di buinore, mê mari, cun cheste filastrocje plovessial, neveassial, glaçassial mi butave fûr dal jet.
E jo ancjemò indurmidît, cjalt come un colomp, o saltavi fûr des cuviertis pront a vistîmi par no murî di frêt in chês cjamaris tant glaçadis.
E dut parcè che a lis siet e tacave la Sante Messe pes Missions, cun tant di missionari, che cui sa di ce mont lontan che al vignive. Al jere un predi ancje lui, sec come un stec, cuntune barbe lungje plui de sô tonie che dome a cjalâle a faseve impression.
Ma ce vevie intal cjâf, e tal cûr, mê mari e dutis chês feminis come jê, che cun tancj fruts a jemplavin la glesie? Nuie, dome la pietât par chei oms e chês feminis tant plui puars di lôr, e par chei fruts cussì lontans, che a murivin di fan e di sêt.
E jere la lôr cussience, a comandâ; la biele anime di chê puare int che e viveve ancje jê inte miserie, cun di plui ancjemò segnade dai dolôrs che lis ultimis dôs vueris a vevin lassât.
Un toc di mont fat di buine int, insome, ancjemò pronte a gjavâsi la bocjade par cui che al sta piês di lôr, convinte che al è just cjoli là che ‘nd è par meti indulà che no ‘nd è.
Une gjenerazion, un popul, magari cussì no, cumò pierdût jenfri lis gnovis modis che si son fatis indenant, o miôr che si è lassât inceâ di une false bondance, smenteant cussì la sô storie, lis valîs dai siei vieris che par no murî di fan a partivin vie pal mont.
Sperìn che al ricjatedi la sô savietât, il so vecjo cûr, propit cumò che chei fruts che a murivin di fan a àn cjatade la fuarce di vignî ca di no par scjampâ de lôr antenade miserie. Sì, ca di nô, che o sin deventâts vecjos e malâts.
Vere, plui siôrs, ma cence sperance, fuarcis e spirt di cjalâ indenant, ma soredut no plui bogns di jemplâ i curtîi di canais. Di chê biele zoventût contente, cui voi pierdûts inte biele stagjon, che a cor daûr a lis cisilis che ancjemo a jemplin i nestris cîi.

di Nello Malisano

5 coments On La setemane des missions

  • A vevin dite di sierâ l’an recuperant une conte dal Contecurte day 2017 ma invezit no! Vuê o nin a cjoli, e planc a planc lis metarìn dutis, lis contis dai contecurte days vieris che vin inmò di meti.
    Vuê us regalin altris dôs. Cheste chi e je chê di Nello Malisano, vincidôr dal 2016 che nus à regalât une conte che e je simpri plui atuâl, tai pensîrs e tal jessi di cumò. Come che al è so costum, Nello al cjale daûr proietant lis robis di une volte cuntun voli che al cjale denant.

  • Grassie Raffaele. Tu mi âs piturât masse ben. Bon an di cûr.

  • Une conte che segne, e intal stes timp e da di pensa a chest mont gnûf che si preste ca indenant, di ce bande che nus tirarà l’ aiar, e se al sarà zefir o aiar di buere, e metint insiemit lis azions di îr cun ches di vuê pusibil mo Signôr che no salti fûr che biele sperance che ducj tegnin in cûr. Biele conte. Lussian

  • Biele.
    Ma in trops sino restâts a pensâle cussì? Che inte al è ancje alc altri in plui da spread?

  • Che inte VITE….al è alc altri in plui dal spread…. (scusait )

Scrîf un coment

This site uses Akismet to reduce spam. Learn how your comment data is processed.

Pît di Pagjine dal sît