Il condanât

La preson e je tantis robis ma, plui di dut, monotonie.
Dut al è za fissât. Di cuant che si sveisi a cuant che si va a durmî, dut al è regolât di oraris e di proceduris decidudis di cualchidun altri. Sul imprin un si inzegne par rompi cheste monotonie, par restâ vîf, ma ae lungje ancje i plui dûrs si usin. Cumò che o soi fûr, dopo vincj agns di galere, mi sint come tun paîs forest là che lis personis a van daûr di regulis diviersis e a fevelin une altre lenghe.
Intant che o jeri dentri, il mont al è lât indenant. I amîs e i compagns a son lâts indenant. Tancj di lôr si son slontanâts e chei altris si son fats la lôr vite. A fevelin di famee, di lavôr, di timp libar. Ducj concets che par me a son deventâts forescj. Tai lôr voi o lei il dûl, la fature di capî e il solêf parcè che a san che a varessin podût jessi tal gno puest.
O cjamini par strade e mi sint intor i voi di ducj, massime chei dai poliziots. Chei che o intopi par strade no san cui che o soi ma al è come se mi usmassin. Al è come se o ves une biele scrite “condanât” stampade intor.
No ai copât nissun. O ai brusât une machine doprade par sbusâ la mont. Par une opare che no coventave, ma che e varès ingrassât un biel trop di professioniscj, politics e mafiôs. Chel istès a son leçs di pueste par chei come me e cussì mi soi fat vincj agns par terorisim. Cinc in isolament totâl. Come se o ves sassinât oms, feminis e fruts… Invezit o ai dome brusât un machinari e fermât un cantîr. O ai fat la robe piês che o varès podût fâur. Ur ai fat pierdi milions di euros.
La preson mi è jentrade dentri. Me puarti daûr pardut. Ancje achì, su la piche di cheste mont. Di chi il cîl al somee cussì vicin. Di chi si viôt la valade interie, ancje la feride vierte dal cantîr. O capìs alore che il condanât vêr no soi jo. O respiri a plene bocje, o cjapi la corse e o salti. Dibot o deventi cîl e aiar, bosc e cret. Par simpri part di cheste mont là che agns indaûr o ai lotât.

di Carli Pup
(conte vincidore dal Contecurte Day 2017)

2 coments On Il condanât

  • E cheste e je pardabon la ultime dal an, e o vin pensât di sierâ cu la conte che e à vinçût il Contecurte day dal 2017, cun merit. Conte perfete, tai timps e te lungjece, cuntun finâl perfet. Nus al à contade Carli Pup, che al scrîf pôc, chi in osterie, ma simpri cun grande cualitât. Une conte che e merete jessi lete se no altri par viodi cemût che si pues misturâ cetantis robis – drame, temis sociâls, costruzion di un personaç, trame – in 2000batudis cence che si sinti la mancjance di nuie.

  • Plasevule conte cun tante atualitât intôr, indula certuns svendaressin ancje le mari pûr di meti in sachete cuatri carantans, e se cualchidun si opon a lis lôr malsanis ideis lu ruvinin rindintlu cidin cun legalitats di comud.

Leave a Reply to Anonim Cancel reply

This site uses Akismet to reduce spam. Learn how your comment data is processed.

Site Footer

%d bloggers like this: