Aghe sporcje

 

Aghe sporcje maledete di dulà sêstu rivade?
Intun moment tu âs savoltât il mont intîr
e cuntune svintade tu âs discrotât i monts dai peçs
lassant inte vergogne dute la bielece de nestre Cjargne.
Ma tal Friûl e inte Cjargne e jê int fuarte
e cence pôre e jê int che no si rint.
Nancje un moment dopo stât chel montafin,
e jerin za li ducj pronts, cu lis palis e i picons
e cu lis maniis tiradis sù fin tai comedons.
Pronts a mostrâ chel popul salt e onest, lavoradôr.
Come che nus àn lassât intune cjançon
i nestris vons. E jerin par un moment,
restâts par un moment, come ingherdeâts
di chê disfate, ma intun lamp e jerin
li ducj pronts a tornâ a comedâ almancul
chel pôc che si podeve, ancje e coventaran
tancj agns o amorons par tornâ come prime.
O soi content parcè che o n’ai viodût che
in Cjargne e in Friûl l’amôr par chest tocut
di paradis al è simpri tal cûr de nestre int.

di Plume di ingjustri

#764

9 comments On Aghe sporcje

  • Al ven a cjatânus in Osterie la nestre Plume di ingjustri, che dopo vê pene publicât il libri “Adam, un emigrant dal Camerun” al vûl tirâ dongje cualche peraule te sô maniere, par stâi dongje ae Cjargne. Lu tignin volintîr in ostrie, cun cheste contepoesie che e je une vore nete, ancje inte aghe sporcje.

  • Al fâs tant plasê sintî nomenâ in ben le int che merte.

    • Siôr Ostîr, lu ringrazii pal
      so preseament, cheste piçule conte che mi à publicade e jê le mari de poesie che o vevi fate, e che fra pôc je mandarai, un grazie ancje a chel anonim.

  • Siôr Ostîr, lu ringrazii pal
    so preseament, cheste piçule conte che mi à publicade e jê le mari de poesie che o vevi fate, e che fra pôc je mandarai, un grazie ancje a chel anonim.

  • Mandi Plume, cuant che o torni in furlanie o cirarai il to libre. Cheste conte? E met sul plat cun poesie lis virtûts de nestre int. Biele.
    Mi fâs plasè che i preseaments dal Siôr ustir ti àn fat plasé. A mi, mi fasin plasê ancje chei dai contacurtârs. E parcé no, se la Conte e merte ancje i tiei.

  • Grazie Nelo, mi fasin plasê i preseaments di ognidun che dopo vê lete une mê conte i sedi plasude grazie Nelo o provi a fâti rivâ il gno libri

  • Gracie Plume ancje se no mi rive. Nello Malisano corso Tukory, 21 – 90134 Palermo. E di Tropea palanchis che o ai di dati.

  • no puès domandâ parcè al è stâtt un regâl de pro loco ma se une persone e vûl a puès fâti un aiût pes spesis grazie .

Leave a Reply to Nello Malisano Cancel Reply

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît