Tal jet di Gregorio

 

La matine che tal jet di Gregorio a vevin cjatade une budiese narançon, e sarès restade sculpide te storie de famee tant che une saete intun morâl.
Il pari, sustât de sô foghe di om e paron, che al difint la famee, al veve subit cjolt nuiemancul che un picon, par copâle.
La mari e zemave e ciulave, vûstu pal schifo, vûstu pal vizi de femine sofisticade che e voleve someâ.
Un barbe al porconave cuintri il Guvier, i poteri forti da la soia e la chimiche butade intal cîl dai avions.
Il nevodut al leve indevant a fotografâ dut un dret, par condividi su Instagram la robe.
La uniche a domandâsi, pluitost, dulà che al fos lât a finîle il zovin e jere sô sûr plui piçule, che cuntune vuicade e veve fermât il picon par aiar.
«Ma cjalait! Al è Gregorio, chê robe li», e veve businât la picinine. «No viodêso la cjalade?  Il tai di muse?»
E e jere stade propite cheste vuicade a dismovi il puar Gregorio, che scjassant lis gjambis si leve domandant ce che e faseve dute la famee in rie denant dal so jet, cui voi scocolâts e la muse colôr di un sanitari.
Se al vês savût subit di jessi deventât une budiese di passe doi cuintâi, no si sarès maraveât plui di masse. Pûr trop, invezit, Gregorio al veve cirût di fevelâ, cul risultât di movi cence sunôr la sô bocje fate di cjartilagjine e lis antenis, gruessis tant che un braç di frut.
No lu vessie mai fat!
Vuicadis, blestemis, cori ca e là… un davoi che lu veve spaurît cuasi tant che il picon, di gnûf pontât viers di lui. Al veve reagjît come che e varès fat cualsisei bestie de sô gjenìe in chê situazion: al veve molade une pedeade che e pareve un taremot!
La stanzie si jere jemplade di un fum colôr cinise e ducj a vevin tacât a tossi e dâ di stomi! Une puçone che si jere sparniçade in dute la vie. Gregorio, lassant la pôre a disniçâ l’istint, al veve viert lis cuatri alis che nol saveve di vê e al jere svolât viers la lûs dal barcon, sdrumant il veri cui siei doi metris bondants di budiese gjigante; cjatantsi libar, parsore i tets dal borc.
In chel, disperât, si veve rindût cont dal destin che i jere capitât…
Une budiese… U-ne-bu-die-se.
Pussibil che di dutis lis bestiis dal mont al ves vût di cjatâsi mudât propit in chê schifarie di inset? E cumò? La sô vite… la murose che nol veve, i milante lavôrs a timp determinât che al faseve… il prestit che al jere in spiete de bancje par cirî di comprâ cjase… la famee che e voleve copâlu cuntun picon… cumò dut al jere pierdût!
Si cjatave li, a svualâ parsore lis cjasis… E a dî il vêr, nol jere mica cussì mâl, svualâ.
Cjalâ il mont di adalt… sintî sul so esoscheletri il clip da soreli di Otubar, inmò fuart.
Gregorio, zire di ca, zire di là, si veve fat vignî fan, e al veve cjatât sodisfazion intun cacâr plen di pomis, glotintlis une a une. Passût, sintint la criure de gnot svicinâsi, nol jere stât cussì stupit di lâ cirî ripâr dongje dai oms. Si jere ficjât sot di un toglât di un cjasâl bandonât, framieç straçs e scovacis. Une schirie simpri plui numerose di budiesis, ator ator di lui, lu cjalave cun amirazion.
Planc a planc, al jere colât intun insium net e profont, pensant a lis milante bielissimis robis che al varès fat tal indoman, e a trop maraveôs che al jere il mont e la vite.

di Rafaêl Serafin

3 coments On Tal jet di Gregorio

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di Pagjine dal sît