Friûl

Mi fevele, il gno Friûl, cun vôs di une mughe, vôs che e nas de cente di cret inlidrisade, dutun di indurance e un nuie di tiere…

O scolti lis sôs peraulis e lagrimis a memoreâ di fantats e oms che a polsin là sù in mont, vitimis sacrificadis par dai interes no juscj…

o sint jevâsi sù suspîrs e cjarecis lizeris che a vongolin viers lis maris e la int cjare che ju sossolin intal cûr…

Lu lei, il gno Friûl, jenfri lis pagjinis di storiis, liendis e contis che lu faserin unic intal so vivût storic dai avigniments.

E je Udin che mi niçule cul cercin de sô culture, furlanetât, sintiments, profums e nasebogns… cuasi un vongolâ lizêr che si jeve di parsore de poesie e musicalitât de lenghe furlane.

Mi involuce, il gno Friûl, cui siei profums jenfri la brume marine, inte Basse. Mi incjoche cul so piçâ salmastri des isulutis, mi sossole cul crevâsi des ondis cuintri i scois di cret, baraçs e splazis salvadis.

Mi niçule, il gno Friûl, cu la musiche dal lizêr piuleç di creaturis che a àn sielt il bombâs d’amôr des cjanis palustris e fros di jerbe par il lor prin piuc ae vite… intal gno Friûl.

di Barbara Battel

 

3 coments On Friûl

  • E su la nestre Osterie no sin sflacjons. Ve chi, bielzà une contute di Barbara Battel, a mieze strade fra il poetic, il romantic e l’amôr par il Friûl, che al è ancje il titul de conte. Di lei intun moment, ma a planc, pensant che pardabon, o vivin intun bielissim puest!

  • Maraveôs il lei di cheste fluride conte di fuarce furlane,disarês poesie, indulà cjape dentri da mont a la marine le nestre amade tiere.Podeve vigni fûr sôl di un cûr vêr di cjame furlane.Compliments a Barbara par il sio simpri biel scrivi. Mandi lussian

  • Barbara, lis tô contis e son cussì bielis che e rivin simpri a tocjami il cûr
    complimentons brave

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di Pagjine dal sît