Al timp da lis mês gnocis

Jo mi soi sposade il mês di Avost dal 1977 (un cjalt di murî), a 22 agns, dopo 7 agns di morosament.
O jeri cussì su la lune pa la emozion, che dal dì des gnocis no mi visi nuie di nuie.
Di bon che o ài l’album di fotografiis se no mi vignarès il suspiet di jessimalu insumiât.
Però o ài simpri in ment ce che o vevi cumbinât cualchi dì prin, cjapâde come che o jeri dai preparatîfs e da la premure di fâ dut in regule: i invîts, lis bombonieris, il rinfresc, lis rosis, il predi, il banchet, la musiche e… il rest.
Po ben, cuant che o soi lade a ritirâ il vistît di nuvice, tal Empori dulà che un pôc a la volte o vevi comprât dut il furniment e là che dal paron ai comès mi cognossevin ducj, busse un, ringracie chel altri, o saludi ducj e vie jo cul pac sot il braç… cence fermâmi in casse a paiâ.
Cuant che o soi tornade in me, o jeri beromai su la puarte, cence che nissun al ves olsât a fermâmi.

La vee di gnocis a une nuvicjute si perdone dut, ma jo, cuant che mi impensi, o deventi ancjemò rosse.

di Maghe Olstrele

2 coments On Al timp da lis mês gnocis

  • Podevìn spietâ lunis, ma la conte gnove e curtissime la metìn sù za cumò. Nus al à mande Maghe Olstrele, che nus conte di un ricuart, cun dolçôr e cuntun piç di ironie… parcè che a nuviçâsi si è emozionâts… e si cumbine simpri alc. 🙂

  • Lis plui bielis contis e son chês che pandin i fats su se stess. Maghe ostrele, se fos lade vie drete, nissun saress lât, a tirai le gjachete, parce il paron, cognosint le onestât, al saveve che doman, e varess paiât,e a che compagnie cun tante ligrie varess regalât, ancje i confets. Lussian

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di Pagjine dal sît