“Tu jeris di Muzane se…
par fuarçe, daspò vê gustât, tu “vevis” (voce del verbo “scugnire”) di lâ a polsâ… cence nissune sium, voe o no voe! Il gno pinsîr al jere dut par chê bici di om che dome gno fradi al podeve doprâ e cussì a ore di mirie, ducj i Battei a polsâ, o soi sbrissade fûr intal curtîl plen di soreli di svuarbâ: o vevi ben smicjât cemût ch’al faseve gno fradi. Gjambe çampe sot dal cambron, a cjaval dal carter e pît intal pedâl, gjambe drete prin par tiere e a piçui sburts dopo inviâde la corse, sul pedâl.
Massime concentrazion e viiie… a voi spirtâts su la ruede, lis mans brincadis al manubri, dopo cualchi sghirlade la bici e va drete e cun fuarce, i doi, duncje, sot cui pedâi…
Un sdrondenon di no crodi intal cidinôr di chel dopodimisdi plen di soreli in bore e la frute si cjate dute intorcolade jenfri ruede, carter, cambron e manubri. Scuasi svignude a sintive lis vôs inc…adis (in piavot, ch’al è piês dal furlan) di chê disdrumarie di parincj cence rivâ a capî ce dal djaul ch’al jere sucedût: “Ma cemût la bici e jere ben drete o jeri cussì ben inviade cui pedâi… ce puedial jessi capitât?” Çusse di frute no tu ti vevis innacuarte che il curtîl al jere finût e il puarton sierât t’al à fât capî ben e no mâl!!!”
di Barbara Battel
#737
3 comments On Tu jeri di Muzane se…
Une curtissime conte di Barbara, che come simpri e va a tirâ fûr lis robis che i son capitadis e nus a lis met suntun plat in maniere semplice, di gjoldi subit intune sole bocjade, cence lâ a cirî gnot… Da rest, chê e va za a cirîle jê cu lis sôs aventuris, che a son ancje chês di ducj no!
Barbara, culì al va ben chel ditt tant doprât in Friûl “spirtade di frute”.Jo di frut o puartavi le bici disore une salide e po mi butavi ju cence pedai, un dì cjapai sot il plevan, lis scussadis mi son vuaridis ma le orele a sun di tiramale mi fâs mâl ancjemò.Barbara no soi rivât a tirà fûr il program, e no ti dîs trop che mi displâs. Lussian
Brave Barbara. Simpri brave e cuntun biel Furlan.