Trê cuintri un al è masse

Inzenoglât su la jerbe, Pieri Snait al steve fer imobil. Dome il voli si moveve, pontât viers il cîl.
Il nûl che lu faseve mateâ al jere propit intal mieç. Di frut i vevin contât che cjalant fis un nûl, chel si sarès disfat, come il sâl te aghe. Di fat, il nûl si disfave, ma si tornave ancje a fâ sù. Si zontave cun chei dongje, al zirave, al platave un toc di lune par tornâle a pandi pôc dopo, come un intun zûc di frutin.
Ma Pieri al jere fer inte sô posizion, come un cjan in vuaite.
In chel, une brise di aiar e veve cjapât sù une fuee e la faseve vongolâ tal vueit. Une fuee smatade, che di muarte a jere deventade vive. Un sbuf di svint le veve fate svolâ, frescje e vivarose, nancje che e ves di tornâ propit sul ramaç li che e jere nassude.
Il voli di Pieri nol saveve ce fâ: di une bande al smicjave la fuee che si svicinave, di chê altre nol podeve molâ il nûl birbant che, di sigûr, al veve capît il dissen perfit che al steve saltant fûr.
Intun acuardi che nancje il plui grant professôr dal mont al podarès sclarì, il nûl e la fuee si jerin intindûts bot e sclop e a zuiavin insiemi cuintri Pieri. Al someave propit… Un svindic de Nature.
Ma Pieri no si moveve. Al spietave la fuee che i rivàs drete sul nâs, ma al restave fis cul voli sul nûl.
Al coventave un calcul svelt di cjâf: trop timp mancje al nûl par disfâsi? E trop a la fuee par rivâmi sul nâs? No si sa. Une robe je cierte: se la fuee a ves di rivâ prime e la tiri vie cu la man, o pierdarès la smicje dal nûl e a sarès la mê sconfite. Mai sarà! Mai!
Ma si sa. Mari Nature je grande e no ti fâs mai mancjâ nuie. Di fat, velu un ucielut di chei berechins che ti pivetin intes orelis e ti stupidissin. Velu che al svolete di ca e di la, intun sturniment di gjonde, cuntune contentece mai viodude.
E cussì, cjalant l’ucielut, il voli al veve pierdût il nûl. Pieri Snait, cence plui ecuilibri, al jere colât par tiere. E sore il so nâs, ben planc, si jere poiade la fuee.
No e no, al veve pensât! Trê cuintri un al è masse!

di Massim Furlan

2 coments On Trê cuintri un al è masse

  • Lu cognossìn par lis sôs contis sul comissari Rocheton. Ma a chi il nestri Massim Furlan, pluri finalist dai Contecurte days, nus tire fûr un altri toc di personaç: Pieri Snait… Us plasarae? O pûr, come lui, sariso sogjets a une inevitabile sconfite par man de Nature? Cuissà… A voaltris la rispueste, a Massim Furlan un batimans!

  • Le fantasie di Massim e je straordenarie intal coinvuelgi e intorteâ acjadiments di ogni sorte intun colp sôl. Un brâf a Massimo di bande me.Lussian

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di Pagjine dal sît