Il çus

Provait voaltris a nassi inte seconde vite su la taule in cusine, sì provait e dopo s’a le savarìn a contâ! Nassi duncje li parsore parcè che ni il sudoku e ancjemò di mancul la television a jemplavin il cjaf cun bielis robis e inalore il gno secont pari al à dât il vie a la mê creazion. Sì, il secont pari , parcè il prin mi veve fât di len, siben che nol veve non Geppetto, ma Zorz Burnich, a mi veve inmaneât lui la mê prime vite.
Su chê taule in cusine o soi nassût par noie, e no jere la prime volte (lu ai capît dopo) che l’Unvier, la stufe e l’estri a sburtavin dentri chel cjâf di omenut! Poben, i à fat sgarfà fûr a chê sô femenute (Sante pazience la sô protetore) il sotscrit, comprât di Zorz Burnich in fiere a Gradiscje , pojantlu daspò dongje de tele… chê in cjase, culì, telis di piturâ a son simpri, vuai un mal di gnot!

E se in prin o jeri di len, cun chest gno secont pari o soi deventât di colôrs, ma migo robe di nuie, veh! Mi soi sintût svualâ intun mont lontan, cun lis monts che neancje intune conte di Andersen a son cussì bielis, di gjavâ il flât! E, in zonte a chest spetacul di cuadri, l’omenut al à metût une robe che e fevele di lui, dal so mont intal cjâf, intal cûr e intes mâns: il bonsai!
Che puare benedete di femenute no veve mai savût piturâ, a scuele, tant che il so professor al tirave dispreseât i siei dissens cuasi come un avion di cjarte vie de catedre cun peraulatis che a fevelavin di verze, brute verze (mai stade ninine, chê frute russite).

Nancje finût la opare mestre, e le vie di corse a comprâ la suaze e simpri li i colave il voli a pene jentrade in sale.
Ancje jo o jeri braurôs di mê, ancje se no podevi palesâ il gno orgoi.
Daspò , une sere, la femenute i fevelà al omenut e cun fâ di preiere i domandà di podê puartâ il cuadri in biblioteche e contâ une conte ai fruts, la “mê” conte!!!

Provait voaltris a nassi trê voltis… Di len… di colôrs e… di incjant tai voi dai fruts…

di Barbara Battel

#729