Il çus

Provait voaltris a nassi inte seconde vite su la taule in cusine, sì provait e dopo s’a le savarìn a contâ! Nassi duncje li parsore parcè che ni il sudoku e ancjemò di mancul la television a jemplavin il cjaf cun bielis robis e inalore il gno secont pari al à dât il vie a la mê creazion. Sì, il secont pari , parcè il prin mi veve fât di len, siben che nol veve non Geppetto, ma Zorz Burnich, a mi veve inmaneât lui la mê prime vite.
Su chê taule in cusine o soi nassût par noie, e no jere la prime volte (lu ai capît dopo) che l’Unvier, la stufe e l’estri a sburtavin dentri chel cjâf di omenut! Poben, i à fat sgarfà fûr a chê sô femenute (Sante pazience la sô protetore) il sotscrit, comprât di Zorz Burnich in fiere a Gradiscje , pojantlu daspò dongje de tele… chê in cjase, culì, telis di piturâ a son simpri, vuai un mal di gnot!

E se in prin o jeri di len, cun chest gno secont pari o soi deventât di colôrs, ma migo robe di nuie, veh! Mi soi sintût svualâ intun mont lontan, cun lis monts che neancje intune conte di Andersen a son cussì bielis, di gjavâ il flât! E, in zonte a chest spetacul di cuadri, l’omenut al à metût une robe che e fevele di lui, dal so mont intal cjâf, intal cûr e intes mâns: il bonsai!
Che puare benedete di femenute no veve mai savût piturâ, a scuele, tant che il so professor al tirave dispreseât i siei dissens cuasi come un avion di cjarte vie de catedre cun peraulatis che a fevelavin di verze, brute verze (mai stade ninine, chê frute russite).

Nancje finût la opare mestre, e le vie di corse a comprâ la suaze e simpri li i colave il voli a pene jentrade in sale.
Ancje jo o jeri braurôs di mê, ancje se no podevi palesâ il gno orgoi.
Daspò , une sere, la femenute i fevelà al omenut e cun fâ di preiere i domandà di podê puartâ il cuadri in biblioteche e contâ une conte ai fruts, la “mê” conte!!!

Provait voaltris a nassi trê voltis… Di len… di colôrs e… di incjant tai voi dai fruts…

di Barbara Battel

4 coments On Il çus

  • Brave Barbara cuntun gnûf gjenar su contecurte: la flabe. Scrite ben, cun gracie e fantasie. Propit di lei ai fruts e no dome inte scuele.

  • Simpri brave Barbara

  • Biei i argoments,biel il to scrivi, indula tu presentis un seren cuadrut di famee leât a lis passions a rindi plui lisere le zornade a fin lavôr. E dopo chel to mût plasevul di intorcolâ i fats cun paragons metuts ju cu le intenzion di meti plui aviditât inte leture.Biele le conte, e plui biele le idee di trasmetile ai frutins di scuele, che mai come vuê a àn tante bisugne di vivi i siumps che le realtât de nature nus presente. Lussian

Scrîf un coment

This site uses Akismet to reduce spam. Learn how your comment data is processed.

Pît di Pagjine dal sît