THEATRE OF TRAGEDY, LOVE LIKE BLOOD e ATROCITY a sunin intune lezendarie sabide di sere di fin di mai 98 intun imens hangar. Miârs di gotics ur batin lis mans. Dulà si viodial un spetacul cussì? In cualchi univiers paralêl? No. Al Wave-Gotik-Treffen di Lipsia.
E je stade chê la mê prime volte, di bessôl, in tren. Mi vevin stiçât i IN THE NURSERY, vint colaborât cun lôr inte cjançon Biello Dumlo (LP LINGUA). Ancje lôr a varessin sunât alì.
Al festival o ai cognossût tante int ma forsi la persone simbul di chel an a Lipsia e je Tani di Zwickau.
E jere un fregul cjocute.
Intun prin moment no vevi voie di fevelâ cun jê. O capivi pôc il todesc e o stevi cidin. Jê e à insistût, mi à dât une scjassade e jo i ai dit alc par inglês. O vin comunicât cussì, mieç todesc e mieç inglês. E jere la fin de gnot e o vevi frêt. Jê mi à zentilmentri cuviert cul so mantel.
Tal dopomisdì mi à presentât i soi amîs tal camping dongje dal capanon dal AGRA.
Viodude ancje l’an dopo, o ai juste cualchi foto di jê ma no sai ce fin che e à fat. In altris edizions no le ai plui incontrade.
Al AGRA, la domenie di sere, no pues pierdimi i IN THE NURSERY ma prime a sunin altris artiscj mitics dal dark: GITANE DEMONE (ex Christian Death), CLAN OF XYMOX e FAITH AND THE MUSE. E dopo ITN a sieraran i DAS ICH.
O fâs a pene in timp a saludâ i In The Nursery, une vore impegnâts a meti a puest i struments. La lôr cjantante Dolores mi mene li di un dai doi zimui, Nigel, che mi dîs che mi mandarà une email. Prime, par jentrâ tal backstage, o vevi domandât infos al presentadôr “scheletri”: un zovin trucât, alt, cui luncs cjavei ondâts e castagns, cotule e cjalcebraghe cui disens dai vues. Al samee vignût fûr dal film THE ROCKY HORROR PICTURE SHOW. Lu incrosarai un pâr di voltis ancje agns dopo e o stimarai il so mût professionâl di presentâ, simpri cul stes costum; lui al è un instituzion ma no ai mai scuviert il so non.
Dopo i concierts o resti al dance-party fin viers lis cuatri di gnot.
O partìs il lunis di matine cul tren EC Mimara. No ai durmît par doi dîs. Il tren mi puarte vie di chê strane umanitât sudade e puçolente di fum, de jerbe secje di mai, di chel odôr di luianie rustide e di bire, dai tram, de estasi, de euforie, des cuarnamusis cul cjâf di diaul…
Ancjemò une volte si è jemplât il cassetin dai ricuarts de mê ment e, cuant che lu vierç, mi vegnin i sgrisui e o volarès tornâ là.
di Checo Tam
#732
5 comments On Amarcord Lipsia 98
Une conte gnove di Checo, vuê, il nestri fidât famei, che come che a savês o cjatais ogni sere su ondefurlane aes nûf, cu la sô musiche dark di indigo. E a chi nus conte, cun aiar dolç e malinconic, di cuant che dut al è scomençât, e di timps che a van e no tornin, ma che in cualchi maniere a restin. E par cui che al à gust di lâ a cirî musiche… baste vê voie.
Le passion de musiche dal Checo, cun biei ricuarts di vite passade, che cuant e tornin in ment si impie il desideri di torna vivi, ma purtrop ” il tempo fugge”. Biele conte confession. Lussian
Brâf Checo! Tu sês inconfondibil!
Ta l’estât dal ’98 mi visi che o eri in plene manie dai Bluvertigo… o ai viodûts 3 concerts tal gîr di pôs mês :O La mê amie e diseve che e jerin “una band da matrimoni”: perfets par sunâ a lis gnocis parcé che a cognossevin tantissimis canzons, difati lis cover che e sunavin e jerin ogni volte diferentis.
Troppo buoni… troppo buoni amici….
Checut