Prin dal svol

I pîts a jerin dividûts in doi. 
La ponte a saltave fûr dal cret, libare, frede, pronte a cjapâ il svol. 
Daûr, invezit, si jere ancjemò tal sigûr, ben plantâts, fers, tacâts sul slis da piere. 
I voi sierâts a fasevin a gare cul nâs e cu lis orelis, cirint di vinci il prin premi des sensazions: il cidinôr messedât cu l’aiar fresc, berdeât intor dal pinsîr. 
Aromai al jere dibant pensâ indaûr. Ducj i modons che a vevin fât sù la sô vite, cundut che a fos curte, a jerin stâts butâts par tiere e slargjâts par ben, come par volêju distacâ di ogni sperance. 
La ponte dai pîts a jere rivade a trê cuarts. 
I braçs ben slargjâts a disevin al cuarp che dut al jere pront. 
Il cret al jere avonde alt. Sot al jere il nuie, al pensave Martin, o pûr il dut. 
Il zovin al sintive l’aiar che a bugadis i patafave la muse. 
Cumò al vignive il dificil. 
Sô mari, so pari, i siei fradis, la none vistude simpri di neri cul façolet sul cjâf. 
Zûcs cui amîs, rimpinâsi sui arbui, butâsi intal flum, o pûr cori framieç lis cumieris da blave. 
No, Martin, no stâ lassâti cjapâ dai pinsîrs. La decision je cjapade! 
Cumò ancje il nâs si met par traviers… 
I profums da stale, dal fen a pene taiât, il forment slargjât intal solâr. 
L’orâr brusât intal spolert prime dal rogan, l’incens da glesie, la polente ta cjalderie. 
Ten dûr Martin, al mancje pôc. Dome i talons a son tacâts al cret, a la vite! 
No bisugne jessi masse braurôs, mai! Soredut in chescj moments! 
Cussì al pensave Martin. I pinsîrs e i profums a vevin dât la lôr ultime sborfade. 
A mancjavin dome i suns, forsit i piês di dismenteâ. 
La cjampanute da buteghe, il cricâ dal fûc, la côt su la lame dal falcet. 
Lis feminis che a cjantin lis litaniis, il gjal a buinore, la fieste in place. 
La vôs di sô sûr a pene nassude, chê dal nono che al porconave, chê di sô mari cuant che lu indurmidive. 
La vôs di so pari che lu clamave… 
– Martin! Martin! 
Il frut si jere ingropât. 
Po dopo al veve spalancât i voi. 
– Martin, smonte dal muret, se no tu colis ta ledre. E jo no ven a cjoliti! 
– Si, pai, cumò o smonti. O svolarai une altre volte.
di Massim Furlan

2 coments On Prin dal svol

  • Ce tancj ricuarts che passin pal cjâf,cuant al pâr che le vite scjampi di man.Lussian

  • Brâf, brâf.
    Man man co leievi la conte o pensavi intun tragjic finâl. Mi soi dismot cuant che o ai sintût la vôs di so pari che lu clamave – Martin! Martin! – – Si, pai, cumò o smonti. O svolarai une altre volte.
    Biele e baste.

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di Pagjine dal sît