Un, nissun… centmil

– Rudy, trops Dius sono?
Il plevan si plante juste devant di Rudy par interogâ. Al à spiegât par dret e par ledrôs, chel grant misteri de Trinitât, un sôl in trê personis e cumò al è il moment de interogazion de ore di dutrine.
Rudy le veve pensade ben di metisi intal ultin banc, il plui lontan chel al sei pussibil dal prin, magari platât de colone, ma il predi lu veve vualmât, alo, Rudy, tu culì, culì devant. 
Le veve fisse cun lui il plevan! Ducj le vevin fisse cun lui!
Sior Pio dome par vie di chê volte che chel forest che al jere vignût cul camion a cjariâ forment, al si veve cjatât cence fanâi la sere, cuant che al veve di partî. Brusadis lis lampadinis? Dutis intun colp? Cjale, che ti cjale, no, lis lampadinis a mancjin, a mancin propi no son, cui aie di vêlis robadis? Rudy! Rudy, can dal to varuscli, dulà sono lis lampadinis?! Eh? Cualis lampadinis? Rudy, no sta fâmi petâ sù la fumate, dulà lis âstu metudis? Ma ce saio jo des vuestris lampadinis! Simpri colpe jo o sarai, cumò! Rudy, dai, dai, sù, no mi rabii, ti doi dîs francs, baste che tu lis tornis. Ce saio jo, simpri colpe jo! Rudy, vincj francs. Ma jo no sai nuie des lampadinis, no sai, no sai. Rudy, trente francs. No, no, no sai. Rudy, cincuante francs. Trops? Cincuante. Eh, sior Pio! Podevis dîmi prime! Lis ai fatis sclopâ jo! 
Lis frutis dome par vie che ur tirave i cjavei e al cirive di tirâur sù lis cotulis. 
Ducj chei de androne, dome par vie che cualchi volte, ma no tantis, al veve rot a clapadadis cualchi pipe dai pâi de lûs. 
Lis feminis, dome par vie che al robave ûfs intes covis des gjalinis, e lui lis covis lis nasave e lis cjatave prime des paronis. 
I oms dome par vie che, cuant che al si rimpinave sui arbui a cirî i nîts dai ucei e integrâ la sô scjarse diete, ur tirave cuintri pignis o sepis o ce che al cjatave là sù.. 
La famee dute di Min Moret dome par vie di chê volte che a vevin il barcon viert e che inte cjalderie de polente che Irme e jere daûr a messedâ al jere aterât cuissà cemût un clap, tirât di chê altre bande de strade, ce smicje, eh!
Rudy! Cundut il cefâ che al veve al scugnive ancje lâ a dutrine! 
E cumò bisugnave rispuindi. A chê domande dificile. Rudy al zirave i voi in ca e in là cirint un jutori. Ma Wilma, la plui brave, umhh, nuie ce sperâ, i veve butât un sgripion intai cjavei juste prime di scomençâ dutrine. Dino, il so compagn plui amì al jere daûr a studiâsi lis coreis des scarpis. Pierin al cjalave il sufit, Leo al cjalave il vueit. I vûl rispuindi. 
Alore. Ce aial dit il predi? Ah sì. Al è un, ma a son trê. Trê. Un.
Rudy al met une man devant de bocje. Par brincâ la peruale, intal câs che, prime che e vadi masse lontane. 
– Doi
Il ton pe orele çampe i rive potent e precîs.
– Un! Al è un Diu. Un sôl. 
Il plevan nol amet cheste ignorance. E nol à vût timp di inzornâsi cu la Montessori.
Rudy al si massagje la orele dute rosse.
– Magari nancj chel no!
di Laurin Zuan Nardins

1 coments On Un, nissun… centmil

  • Laurin,tu mi âs fat vignî a ment le prime zornade di scuele(1951)in cuinte elementâr,il mestri domande"chi di voi à canne d'india a casa?"si à sintût un io, io,di ogni bande,il mestri ordene a di un di puartâ "solo la punta"l'indoman rivave la "punta" pensant fossi par influrî l'ambient,il mestri tirave fûr de sachete un curtisut taiant vie i ramaçuts laterai creant une biele vuiscje,po dopo ordenave "fuori le mani",e par dret e ledrôs lis vuiscjave a sanc, e i poleçs (geloni)su pai dets rinfuarçavin dolôr.A cjase i gjenitors domandavin ,ce astu fat in ches mans,rispueste,lis ài scussadis cul lâ su pai lens,disint la veretât jere la prionte,e convignive cussi. LUSSIAN

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di Pagjine dal sît