Compits par cjase

Di frute, cjavei ros e pivicjis, no savevi ce ch’al vûl dî diari: si veve un cuader dome pai compîts di cjase e li a si ju faseve. Subite dopo mangjât (su la taule sîs dîs su siet e jere la mignestre di fasui e s i m p r i cun dentri il rîs “originario”) par sghindâ di lavâ i plats o levi in bagn, zurant a mê mari che no podevi fâ di mancul; no o jeri jo furbe e jere invezit mê mari che a ‘nd veve tante pazience. Poben, dopo jessi stade in bagn, come mosse strategjiche, di solit i plats ju veve za fâts mê mari e jo mi metevi a fâ i compits di buine uce, parcè chel sì che a mi plaseve!
Intes scuelis mediis, a Tor di Zuin, il siôr Pascut, viodût che i libris par solit no ju paiavi par vie de medie alte dai vôts, a mi deve dongje cui libris un diari che piês di cussì nol podeve jessi, a nol veve nuie di ninin, di ce ridi o di ce imparâ, le robe plui di avilizion pussibil…
Cuant che o soi lade al Zanon, ancje li a vignivin incuintri cui libris, simpri par vie de medie scolastiche dai vôts, ma inte librerie di plaçâl Cavedalis a mi sgnacavin simpri il diari di Jacovitti, che, o vês di crodimi, no podevi viodilu cun dutis chês fetis di salam e chei stupidats di paiasos cul sombrero; o sai che i plasevin a tancj di lôr ma a mi mi stevin propit sul stomi e o vevi cetante invidie par la mê compagne di banc, Daniela, che e veve (biade jê) il diari di Charlie Brown!
Cumò o sin rivâts a none Barbara che, par joibe, à di parecjâ doi compîts par cjase: il prin par Maurizio Mattiuzza e il secont par Franco Marchetta. Cumò o soi sigure che cualchidun a si domande parcè che soi chi daûr a piedi timp, a tedeâ, invezit di fâ alc di bon: il probleme al è che fin che si fevele di scrivi in prime persone, tabaiote come ch’o soi, mi va di Diu, e ti scrîf cun gjonde un biel pocjis di fufignis, MA cui dialics…. mi è une vore penze le robe e se o podès fâlu mi sierarès in bagn come che o fasevi cun mê mari, ma le frute russite e plene di pivicjis cumò e je deventade none Barbara e à di imparâ ancje a fâ ancje chel che no i sgniche cuissà ce: par usgnot o ài tirât indaûr il cûl, ma di doman la solfe e à di cambiâ, lu zuri!
di Barbara Battel

4 coments On Compits par cjase

  • Tu âs che biele sinceritât che ancje a cost di danegja le to persone(la fughe in bagno par no lavâ i plats)no tu fasis di mancul di doprâ le veretât,cjosse che par chel che ti lei, fâs cressi le stime tai toi confronts. LUSSIAN. BON NADÂL A DUTE LE CLAPE DI CONTECURTE.

  • Barbara a mi invezit Cocco Bill e Trottalemme a mi plasevin di fâ tramâ fintremai di grant, ch'a compravi "Il Giorno" dome par chel. Al ere un pensâ cussì fûr di scuare ch'a i voleve un grum di fantasie par stai daûr. Lu vessio vût cuant ch'o levi a scuele jo. Po ben noaltris a si vuelin ben l'istès, e si fasin i auguris di Buinis Fiestis par ducj i contecurtârs, Bepi

  • Bundì.
    Ma esal sierat il blog?

  • Ce robe? chel cjavon di Ciarli Braun mior di Jacovitti? Heresia Heresia! W i salams che a cjaminin! abbasso la cuviertate di linus!

    HT

Lasse une rispueste a Anonimo Cancele rispueste

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di Pagjine dal sît