Ancje jo sul palc (intal me piçul)…

 

Une gnot barbare a rondolâmi intal liet, cence rivâ a cjapâ sium… sintî le musiche dal ronceament dal gno om, zirâmi planc par no sveâlu e tal ultin de torture aes cinc di matine mi soi jevade sù e o ai scrit cul ordenadôr un alc par dii graciis a lis mestris dal asîl pal ben che i àn volût al nestri nevodut par scuasi dut l’an dulinvie che al è lât a scuele.
Cun fature e un pocje di pôre de sô rispueste i ai lete le robe a Odillo, i ai dite di volê dâle a lis mestris intal spetaculut che a faressin fât di li a pôc.
Une corse sbalsamade fin inte sale de parochie e po ben, vemi alì disore des breis dal palc, la muse in bore, no di sigûr dute a plomp cu la petenadure o cul sbelet.
Cul cûr e cu le vôs che e tremave o ai scomençât.
Un segn di ridi ogni matine, pal frutin o pe frutute plui in crisi ancje un abraç consolatori dal distac de mame, dal pari, de none o dal nono: par ognidun un benvignût personâl.
A ’nd è un che al conte il cemût che intun smursiel a si à fat une vuadule no di pôc e a si disarès ch’al è un atôr denant di un public prestigjôs che di plui no ’nd è, ven a stâi la sô mestre.
Tu puedis ancje viodi il svant di une frutute denant dai compliments par lis scarputis gnovis di pache, “trendy” a disin par television, che i fas la sô mestre!
Vôs, musutis, lagrimis suiadis cu la maniute dal grumâl come se al fos un façolet, nasuts cui pavêrs ancje a colôrs (None Barbara snacai!), par duçj une cjalade d’amôr.
A no ’nd è avonde volums e libris par contâ il gracie che ducj nô us disin pal sintiment e la passion che o metês inte vuestre profession.
Chescj a son i prins pas dai nestris piçui, jentrade e confront inte comunitât. Passuts prin incierts e po dopo dilunc vie simpri plui sigûrs, scomençant dal nît de infanzie, daspò le prime classe dai piçui, dai mezans e tal ultin dai grancj.
Cressite di par di sot dai vôi atents ancje a viodi la sfumadure de personalitâts a vignî, ma ancje a bonâ lis barufutis nassudis sot de ombrene dal vecjo tei, pensant che la mestre no ju viodedi. E invezit a si sint jenfri tantis vosutis le vôs de mestre che e vose: “Ou, atents voaltris doi, daûr dal tei, jo us viôt tant ben che mai, o ves di finîle di sburtâsi.
Mil e mil senis ancje di ridi, come fii che a puedin someâ a la coltre di Linus, cuside cun dolcece e amôr, cence contâ po dal bonissim insegnament di scuele!
Mil e miliârs di fii di cheste cuviertute che ju fasin sintî volûts ben, lis nestris creaturis! E par dut chest, o vin agrât a voaltris, super mestris dal nestri asîl!!!
Graciis de bande di none Barbara, nono Odillo, maris e paris dai nestris fruts !!
Finût di lei no ai sintût a bati lis mans, dome un cisicâ inta la sale, o soi lade dongje di une amie e le ai viodude cu lis lagrimis intai vôi, ma o soi svolade vie in biciclete a cjase, par jessi di peraule cun Odillo. Le matine dopo mi àn dite che a ‘nd jerin tancj che se no vaìvin a si soflavin il nâs!
di Barbara Battel
#691

10 comments On Ancje jo sul palc (intal me piçul)…

  • Vemichì, Barbara, ancje jo a vaì devant dal ordenadôr. Bravissime!

  • Barbara, tu disis "in tal me piçul" e jo o zonti:
    -"si, tal to piçul, ma cuntun cûr grant grant" –
    Brave. Come simpri tu tu rivis tai cantins plui intims e umans.

  • Gjovane e Galliano ma trop ninins no seso mai? Mi fasês ingropâ e il plasê al è une vore bocon parcè che lis mês peraulis us rivin cu la lenghe che jo o adori! Grassie!

  • Barbara tu as le facoltat no di poia le pene su cjarte, ma direttamentri su le anime di chel che ti lei. Lussian

  • Brave Barbara, al biel il to furlan, la tô gracie E un pôc o soi invidiôs. Mei fiis invezit di fami deventâ nono, mi puartin a cjase dome bestiis. Il cjanut, il gjatut, une cunine infin une. Par fortune mi tocjin il cûr ancje lôr.

  • Une siore ch'a intenz la pene tal cûr prin di scrivi..Bepi

  • Amcje vuê come le prime volte che o ài let une tô conte ti fâs tancj compliments parcè che tes tôs contiis,si rive a sintî che lis peraulis a jessin dal cûr e de tô anime brave come simpri

  • Eeeeh none Barbara, cussì "tacade" a chel frut come ogni none a vares di sei :), ma ancje cussì atente a font al mont che i gire atÔr. Bravissime. Sergio

  • Barbara, o jeri lontan e nome vuê o ai podût lei la tô conte.
    Ce aio di dîti, nome une femine a pues meti ju cussì ben in peraulis, l'amôr che e à pe sô famee e par dut il creât. L'om in gjenar, e mi met jo par prin, al è plui "dûr" e forsit nol è usât a pandi cussì ben i sintiments che al prove.
    Continue cussì che forsit tu mi judis a dismuelâmi un pôc.
    Graciis di cûr.

  • Simpri une emozion leiti!
    Vito

Leave a reply:

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît