Cuistion di pronunzie a scuele

Us ài contade chê di ‘gne Miute; ve ca cumò chê di Bruneto, un gno compagn di banc, une paste di zovin.
Duncje, finidis lis medis, o soi lade a scuele a Udin.
Là, jenfri une sdrume di professôrs, al jere un che al rivave de basse Italie.
Al veve un difietut di pronunzie tal talian, ma nissun al veve fiât di dâi dal teron, parcè che al jere un bon cristian, che al cirive di judâ no di freâ. E po… parcè che al jere un toc di om che mai.
Par fâle curte, a Bruneto i à tocjât di jessi il prin interogât.
Il professôr bot e sclop:
– Dimme a cappetale de Greccia.
Bruneto, bocje vierte e voi scocolâts, i sigurave di vê il non su la ponte de lenghe, dome che no i vignive fûr.
Si sfuarçave di fâ dôl ai claps, ma nuie di fâ: no i vignive tal cjâf il non di chê Capitâl.
Alore il professôr che, come che o ài dit, al jere un bon om:
– Te voggio iutà, Brruno: a-tenè o non a-tenè in ta capa?
Ma lui ancjemò cidin; anzit nus cjalave nô dut stupidît.
Intai ultins bancs, a scomençavin a remenasi su la cjadree par no ridi.
– Ah, Brruno, Brruno… gnente a-tenè in ta capa.
E jù ducj a ridi intant che Bruneto mi mugugnave:
– Porcofûr a ti e ancje a lôr… e di bon che al voleve judâmi, chel mostri di professôr.
Cussì e je lade inta chê volte.
Vuê no sucedarès di sigûr: si dispatùssisi prin cu lis lenghis.
… Forsit ancje masse: cun dutis lis cjadencis che si sintin ator, si riscje di capîsi simpri mancul.
di Maghe Olstrele

5 coments On Cuistion di pronunzie a scuele

  • Benvignude Maghe Ostrele te ostarie di contecurte. Biele e gustose la tô conte. Sperin che la tô passion di scrivi a deventedi un gnûf cuader par cheste ostarie. Promet che a la prossime conte ti pai un tai. Ti consei di blanc, al è plui bon.

  • S'a i a la domandave cu la A maiuscule a Bruneto a i vignive di sigûr iniment A-tene.. daspò cheste batude soi deventât ros..Bepi

  • Profiti de ospitalitât de Maghe Olstrele par augurâ a ducj i contecurtârs une Pasche sclete ma biele..Bepi

  • Simpatiche conte dongje il plasè di lei maghe olstrele pe prime volte,sperant di sinti altris contis sul savor di cheste.O profiti ancje jo di fa augurs di buine Pasche a ducj,Gjestors e sorestants de ostarie. Lussian

  • Cul benvignude ae Maghe Olstrele, o fâs i miôr auguris di Buine Pasche a ducj i Contecurtârs, a chei che a podaressin jessilu ma a àn pôre di mostrâ la muse, al paron de ostarie e a chei che i dan une man.
    Mandi

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di Pagjine dal sît