Bestiis

Di cuant che Irme e veve tacât cu la naine che “Gli animali sono meglio degli umani”, Sandrino le sopuartave plui.
Al pareve che al fos miôr un cristian inneât che un gneur cjapât sot de machine!
“Ti jemplarès la cjase di bestiis!” i diseve sustât.
“Magari! No sai ce che tu spietis!” i rimbecave chê altre, braurìne e smorfiose.
Sandri la cjapà in peraule, profitant di un barcon viert in sfrese. 
Nol saveve se i varès fat cambiâ idee, ma di sigure Irme e varès vût miôr un om, pluitost che ducj chei viers, cudui, ruiis, pantianis e vuarbits che i veve butât dentri. 
Al tirà indaûr dome une magne… ma no par un ripensament: al veve viodû che ancje il veri de machine, al jere mieç viert.
di Raffaele Serafini
Contis dal Ostîr

2 coments On Bestiis

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di Pagjine dal sît