Invidie buine, la mê, intal scoltâ Jacum Trevisan che mi contave dal so professôr di lenghe furlane, Mitri Gotart, di cetant ben che i le veve insegnade, di trop che i veve plasût…
Jo no vevi vût la stesse furtune, une tipe plene di stice a mi veve fat bati la lune, cundiplui vignî il pêl dret pardut… si ben che no ‘nd ài cuissà cetant pal cuarp!
Scuasi mi cjati a dî graciis, cumò come cumò, par dut il marum che mi ‘nd à fat gloti, jê cu la sô massele uçade come la bolp, dutis lis voltis che i fasevi (cun ingjenuitât) cualchi domande. Cjoche di displasê , passât cualchi mês, mi soi iscrite (a dispiet dal parê dal gno om) a un cors di Bottega Errante. I miei trê professôrs Walter Tomada, Maurizio Mattiuzza e Franco Marchetta a mi ‘nd àn regalât la gjonde plui biele di arleve, si ben i sessante e passe lunaris che mi puarti intal cûr e inte anime.
Cumò il professôr Mitri lu cognòs ancje jo e o sai a capî lis peraulis di Jacum, che a son deventadis ancje “mês”, insiemi aes emozions di imparâ la lenghe che simpri mi ‘nd à plasût.
No pues continuâ il cors cun lui par problemis di salût dal gno om, ma o sai ce ch’al vûl dî cognossi un professôr che inte lavagne de vite dai siei arlêfs al scrîf:
INSEGNÂ = vôs dal verp (e tal cuâl) VOLÊ BEN, mût infinit.
… la lezion e jere finude, o jeri daûr a lei chestis cuatri riis di salût al professôr Mitri, in zîr in zîr de mê cjadree, i compagns di cors e lui che… cui voi ridints mi ‘nd à murmuiât cun dolcece: “Aio di vaî?”
di Barbara Battel
#665
6 comments On Pèule puarte-ben
Ben po Barbara, o jeri ancje jo dongje di te cuant che tu âs let la tô letare di cumiât a Gotart. A si sintive che ti displaseve une vorone molâ lis lezions a Codroip, ma pai motîfs che tu âs pandût tu jeris plui che justificade.
Jo o ai vût un grant plasê di veti vût dongje in tes lezions e o varin mût di tornâ a viodisi in cualchi altre ocasion.
Po dopo ti visi ancje che il Cafè Leterari di Codroip, li che o soi soci, al stâ metint adun une serade a Vile Manin, par ricuardâ pre Toni Beline e al vignarà a tabaiâ ancje Gotart Mitri. No mancjarai di invidâti.
Mandi Barbara e continue a scrivi.
Barbara, il furlan ch'a tu scrivis e o pensi ch'a tu fevelis al è il plui biel ch'o vedi sintût chenti atôr, il vêr furlan par gno cont..Bepi
Bepi, un compliment une vore bielonon par une piavote (o soi di divignince venite)e mi scjalde il cûr propit parcè che il furlan e je la lenghe che simpri o 'nd ài bramât di cognossi fintremai che, dongje dai sessante lunaris, o soi lade e colade jenfri lis maselis de bolp…par dopo svualâ intal cîl di professôrs che a coniughin il verp "insegnâ" tal e cual al verp "volê ben"…graciis Bepi
Barbara,e je maraveose e grande le to passion pe nestre lenghe,ancje considerant che tu ses oltrane de nestre tiare,e pensa che tancj tra no si vergognin di doprale,strupiant che altre ancjemò biele di puar Dante.Une femine e ten su cuatri cjantons intune cjase,tu tu tegnis ducj cuatri sul Friul.Cun stime e amirazion, Lussian
Barbara, che maestre plene di stice che ti veve fat vigni il pel dret, no al è che ti vedi mitude in cjastic daur de lavagne inzinoglade sui claps, o viot che ti à restade sul magon.Cjossul
Lussian, ninin e masse bon cun me! Par te, Cjossul, la stiçose no je rivade a butâmi fûr de classe, ma mi 'nd à murmujât:"Jo o ai sielt cheste leture e a cui che no i va ben… (à cjalât la puarte!)Il dut sot vôs par no fâsi sintî di chêi altris. I clas le varessin fâte gjoldi un grum..ma forsit al sares stât un tic fûr leç