Di cuant che Palmegnove e jere lade a finîle su la vuide de Lonely Planet, e mieç mont al veve tacât a nomenâle pe sô forme, no veve maraveât nissun la decision de Stele, Multinazionâl bocognone dal setôr alimentâr, di spostâ le sô sede propit achì, a Palme.
A jerin stâts comitâts di proteste, – pôcs e ducj fats di vecjuts che nuie vevin voie di savê dal progjet di ricualificazion de place – cualchi arest di chei cuatri zovenots cui rincjins di ogni bande de muse e i cjavei mâl petenâts, che a vosavin di molotof e riviei, ma ae fin la sede e veve cjatât puest, propit li, tal mieç de citât. Il marcjât al jere stât spostât jù pes viis, e lis buteghis, al va dit, a fasevin une vore di plui afars, cun ducj chei manager in golarine che a ziravin ator pal borc, cuant che a vevin finît di vore.
No si podeve dî che a fos brute, al pensà Rudy, rivant denant dal puarton in ciment a forme di gubane che al faseve di jentrade. La Stele e jere une imprese une vore atente al marketing sociâl, e e veve fat sù la sede studiant la realtât locâl e paiant un architet di gale par meti dongje une opare che e fos sedi un manifest par i prodots de regjon, sedi un spot pe imprese. Lis muris, di fat, ancje lôr a forme di stele, a ricuardavin i cjastiei furlans de ete di mieç, ma a vevin parsore sculturis che a cjapavin la forme des merendinis produsudis de Stele Ltd.
A Rudy no i pareve vere jentrâ di membri dal consei di aministrazion, ta chel puest.
Dopo agns di gavete al veve mostrât trop che al valeve cun pocjis peraulis e tancj fats, come che si conven al stereotip dal furlan. Cuasi ducj i prodots che al veve curade la imagjine a jerin deventâts nuiemancul che stars del tacuin de Stele. E nol jere nome un zûc di peraulis. E il so prin Consei al jere nuiemancul che chel al intigneve a une decision fondamentâl pe vite de aziende, ven a stâi l’abolizio di un ingredient che aromai tancj a odeavin, disint che al faseve mâl ae salût, ma che dut câs a nol veve sostitûts, e cence di lui la cualitât di ogni prodot e sarès stade sbassade di brut.
Rudy al veve studiât la cuistion a fonts, e al veve ideis ben claris. Al spietâ cuiet di vê la peraule, e cuasi ducj, prime di lui, comprendût l’Aministradôr Delegât, chel che ae fin al decideve, a jerin dacuardi par gjavâlu. Si jevà inpins e al disè ce che al veve di dî.
«Achì,» al disè poiant un pac di cjartis su la taule a forme di paneton, «a son i studis che a mostrin come che la spongje, o ducj chei altris vuelis vegjetâi, a fasin plui mâl di ce che noaltris o vin voie di gjavâ. Si cjacare dal 30% di dam in plui al organisim uman, cence contâ che i nestris prodots a saressin mancul morbits e mancul bogns. Cun di plui, la rese par etar di chescj vuelis alternatîfs e je cetant plui basse, e un puaret al varès di lavorâ il dopli par produsi la stesse cuantitâ e si scuegn disboscâ ancje il dopli di arbui, par mantignî i nestris nivei di produzion. E je vere… se nô o tachin a dî che lu gjavin, si vendarà di plui, parcè che o nin incuintri a lis bufulis dal web e de int plui stupide, ma in cheste maniere a larìn in piês sedi tal sfrutament dal planete, sedi tal lavôr, sedi te salût. Insome, la soluzion miôr e sarès spiegâ, magari cuntune campagne di cuintrimarketing, che al baste la moderazion intal consum, ancje se magari o varin cualchi vendite di mancul, tai prins timps».
Finide la sô cjacarade, Rudy al cjapâ i compliments di bande di ducj, comprendût l’Aministradôr Delegât, che al confessà che nol saveve dutis chês robis. A meterin la cuistion ai vôts: man alçade pai contraris al provediment. Il braç di Rudy al fo l’unic a jevâsi.
Al jere decidût: la scrite “Senza olio di palma” e sarès lade su dutis lis etichetis, stabilint la vitorie de superficialitât dai social network e la sconfite dal bon sens e dai dirits de inte dal mont plui puar. O almancul cussì al pensave Rudy, avilît, sentât sul scjalin fûr de sede, la cjamese mancul fruçade dal so orgoi.
Une man i si poià su la schene e lui nol ve nancje il coraç di voltâsi.
«No stâ a cjapatâle, une volte ancje jo o jeri come te. Ma dopo o ai capît che il marketing nol à di vê ni dûl ni cûr. E cjale cumò, dulà che o soi», i disè l’Aministradôr, cun bocje di ridi, slungjantji une man. Rudy, cundut di chê man, al fasè une vore di fature a jevâsi inpins.
di Rafaêl Serafin
#645
#645
6 comments On Vueli di Palme
Cuant che le diossine,il mercuri o altris demonis incuinants e superavin i valors intes aghis dal mar,bastave sol fa cresi i numars che stabilivin il nivel di vuardie,e "via col vento" disè chel.Lussian
Robe di Gelo Rafael… Bepi
Cence nissun dubi, cheste e je farine dal sac di Rafaêl, che al è simpri bulo e al pas cui timps.
Po dopo soi dacuardi cun Rudy; provait a gjavâ il vueli di palme de Nutella e viodarês ce porcarie che e ven fûr.
Magari cussì no, al è il marketing che nus invelene, che nus oblee a mangjâ porcariis…
Lassìn stâ e mandi
Farine dal ostîr. Nelo
Lussian, Bepi, Nelo… di sigûr voaltris o cognosses ben il scrivi dal nestri ostîr….par mê, çusse come che o soi, mi pensavi fin in prin, che al è stât Franco Vigo. Podeso fâ in maniere di scanzelâ il coment se la robe e je masse fûr di cjâf?
nol è nancje gust, aromai a induvinais subit! 🙂