Su Contecurte no publichin poesiis, lu saveis, ma o vin simpri une vore, ma une vore di gust cuant che un Contecurtâr al ven preseât e al cjape cualchi biel premi.
Al è di pôc che un nestri contercurtâr al à cjapât un biel ricognossiment: la segnalazion intal nomemât concors “Gjso Fior” inmaneât dal comun di Verzegnis.
Si che duncje, jessint che Gianfranco, che nô ducj o cognossin cul non di Plume di Ingjustri, al è stât cussì zentîl di regalânus la poesie, e al gust di condividi cu la nestre osterie la sô sodisfazion, vele chi, la poesia segnalade.
Grassie, e ben fate, Plume di ingjustri!
Un cuadri tal cîl
Cuant che la lûs
planc a planc si distude,
daûr des cretis dai monts,
e lis vôs si pierdin glotudis dal scûr,
mi plâs cul pinsîr
tirâ dongje ducj i nûi,
sparniçâts lenti ator,
e cul inzen di un pitôr,
fâ intal cîl come dal vêr,
un cuadri dal nestri Friûl.
Dentri dal sfont de cengle dai monts,
meti chel biel incjant
des valadis de Cjargne,
cui roiuts di aghe nete resint
che ven jù cjantuçant,
jenfri dai claps e la calme dai pins,
ingrampâts cu lis lidrîs intai crets.
E su ogni slambri di tiere,
fâ une piçule baite,
cul fum che al jes dal camin,
che al odore di cjalin,
e di frico di malghe.
E plui jù,
prin de plane,
in ogni slac dal Dean o dal Fele,
poiâ ducj chei paisuts
che e parin jessûts di un libri di flabis.
E sot sere,
jentrâ tai fogolârs,
cul fûc impiât sot lis cjalderis,
e tal sclopetâ des slusignis
cjoli su chel bonodôr di polente
e fissâlu tal cuadri ancje chel.
Daspò,
cul aiût dal aiar di tramontan,
puartâlu a ducj chei furlans
lâts a vore pal mont,
lontan di chê tiere
che an dentri tal cûr.
4 comments On Un cuadri tal cîl
Compliments a plume d'ingjustri par ve cusì ben incurnisat le nestre maraveose cjargne in chel capolavor di peraulis. Lussian
Brâf a Plume di Ingjustri che cun tant di biele poesie us conte il nestri Friûl. E brâf ancje a Lussian, ancje lui un contecurtâr che, simpri cu la poesie, us conte cu la sô racolte di poesiis " Scleses di vite" un toc di cûr dal nestri Friûl.
Nelo
Un grazie di côr al nestri cjâr ostîr Rafaele par dutis lis voltis che mi à dât il sô preseament e
a ducj voaltris che o ves tant preseade la mê poesie.Cuant che o lei lis vuestris peraulis mi sint tant content che o pues dî come che al veve dit il nestri grant scritôr Carlo Sgorlon " Al è come se une plume mi cjareçàs il côr"
Brâf Plume di Ingjustri.
Benvignût che al sedi chel aiar di tramontan che al è rivât fintremai a cjase mê a Buenos Aires puartantmi chest biel rivoc dal Friûl.
Compliments pal ricognossiment vût.
Ti auguri un bon e prolific An 2017