A Dignan e vîf une bielissime fantate, Virgjinie, bionde di cjavei, doi voi celescj e cuntun cuarp di gale; cence contâ dôs latariis di gjavâ il flât. I fantats dal paîs a deventin mats par rivâ a vêle, ma je e spiete alc di miôr e no si fâs tocjâ di nissun. E ven de famee di Patàc e par chest la clamin “la Patachine”. Jê e lavore in filande come dutis lis fantatis e lis feminis dal paîs e e spiete la ocasion juste par maridâsi ben.
O sin intal ’45 e i Todescs a àn ni vore bisugne de sede par fâ i parecjadudis e cussì, par fâ cressi la produzion a fasin diretôr de filande un cjapitani dai lôr, Helmut, biel om, zovin e di caratar fuart, che in pôc timp al rive a fâ rindi di plui la fabriche. Ven a stâi che il cjapitani Helmut, vent olmât chel toc di fantate, une dì la fâs vignî “a colocuio“ intal so ufici. Di che dì, la Patachine e va dispès intal ufici dal diretôr e lis sôs compagnis di vore e àn une invidie mate cuant che la cape e ven a clamâle, e jê, molant il lavôr su la galetere, si slontane cuntune bocje di ridi. Po ben, la Patachine e va intal ufici scuasit ogni dopomisdì e jê e lavore plui sul divan dal diretôr che su la galete. Il cjapitani Helmut i à prometût di puartâle in Gjermanie, finide la vuere, e je no viôt la ore di molâ chel paîs di miserie e lâ a fâ la siore.
Magari cussì no, par i Todescs la vuere e sta lant mâl e i Merecans a si svicinin simpri di plui. Une dì, cence dì ni siet e ni vot, i Todescs a montin sui lôr camions e puartant cun lôr nome lis armis e il stret necessari, bandonin di buride il paîs, par tornâ in Gjermanie.
Ae Patachine, restade a bocje sute, aromai cjacarade e cun la gran pôre che i partigjans a vegnin a cirîle par tosâle par ben, come che a fasin cun dutis lis feminis che si jerin metudis cui todescs, no i reste che scjampâ dal paîs.
Cualchidun, par svindic, al picje in place un cartel, cun cheste filastrocje:
“La filande di Dignan
e à lavorât par dut il àn,
sot la direzion di un muc braurôs,
che la Patachine e crodeve al fos stât il sô morôs,
ma e je rivade la ritirade
e la Patachine e je restade freade.”
La Patachine no je plui tornade a Dignan ma intai agns cincuante cualchidun dal paîs, jessint a vore di muredôr a Milan, al zure di vêle viodude di gnot, sul viâl Zara, cui stivâi e la borsete, lâ indenant e indaûr sot di un lampion.
di Pauli Jacuz
#641
7 comments On La Patachine
Di sigur Milio dai bobis.
MK2
Pues jessi pardabon sucedude; in timp di vuere an cumbinavin di cuetis e di crudis. Il finâl al è mareôs e se la Patachine e fos lade in Gjermanie al sarès stât miôr par je e forsit ancje par no, che cumò o varessin la Merckel a comandâ; cuissà.
Dut câs par me e je di Nelo, che al è puartât pe nature, come che al dîs Bepi. In confidence Nelo, o varès dât ancje jo une sgurladine a lis tubaduris de Patachine, se o fos stât intai bregons di Helmut.
Ce dîstu?
Mandi
Usti, mi dismenteavi.
Ni vore di compliments al Bepi, che su lis pagjinis dal Strolic Furlan pal 2017, al à scrit 12 bielissims articui di Astronomie (un par mês). Metûts ju ben e cuntun lengaç a la puartade di ducj. Ben poiade Bepi e gracie.
Mandi
P.S.: o cjapi la ocasion par invidâ, chei che no lu àn ancjemò fat, a notâsi ae Societât Filologjiche Furlane. La poie ae nestre lenghe, si fâs ancje cussì.
O soi sigûr che le à scrite Pauli, che cun astuzie al sosten che le ai scrite jo. Pauli brâf par dabon. Une biele conte come tu fasis simpri tu.
Nello
Come simpri o scuasi o vevi scrit un biele naine contant che par me al prin puest come suspiet al jere Pauli, par vie di chê " an ni vore" che Pauli (ma ancje Nello) a doprin intal lôr biel scrivi. Cumò a l'è clar che al reste dome Pauli: bielonone la tô conte, la vevi lete in talian ma scrite cussì e je une vore miôr. Compliments di cûr par il tô scrivi sclet e matanic!
Ancje a mi mi puce di Pauli, ch'a i dîs graciis pai compliments su ce ch'o ai scrit tal "Strolic pal 2017". Dut merit di Dani Pagnucco, ch'al à metût anime e cuarp sore nuie ancje lui par dâ fûr in timp la riviste, ch'a è une vore biele. Bepi
Brâf a chel che le à scrite, al à rispietât la veretât dai fats. O pensi che al sedi Pauli Jacus.
Ancje tal gno paîs e je sucedude une di chestis azions punitivis cuintri une biele fantate dai cjavei bionts e riçots, dome che cheste no jê lade di nissune bande come Virgjinie, si je fermade cjalant coragjose al svindic tai voi. Passât un timput di clausure dut il paîs i podè viodi il cressi dai riçots cuant che leve ator cu la biciclete metintju in biele mostre.
Lassant di bande cualsisei considerazion personâl che si vueli dî, par gno cont a forin azions di barbars.