Al cjaminave di diviersis oris ta chê pâs, sul Cjars dongje Sant Martin. Chê dì al veve fat un grant zîr intai lûcs de vuere rivant des cavernis dal Sant Michêl fin al pedestal di Corridoni e polsant sentât su chel scjalin dongje dai grums di tiere rosse puartade des furmiis su la colone vecje desenis di agns. Chês a vevin cjatât un bon ricet dentri des sclapaduris dal grant pedestal; a vevin ancje lôr lis vueris, al pensave lui; a comunicavin, a vivevin in societât come i oms, cun gjerarchiis, a sfrutavin altris insets e… se l’om al sparive de Tiere lôr a varessin continuât a sorevivi; di chel si podeve stâ sigûrs. Al jevà sù e al tornâ a cjaminâ.
Traviersant un roiuç si inçopedà intun alc: une ponte e vignive fûr dal teren. A un trat il cîl al tacà a lampâ inceantlu! Altris lamps a intermitence e lui si cjatà tal mieç di un grant fumeron. Nol sintive nie. Al jere colât intune buse!
Nol rivave plui a ricognossi il paisaç di prime: la stradelute cui morârs, lis plantis zalis, rossis e maron…
Il paisaç dulintor, plen di busis, al jere voluçât di un caligo penç che ogni tant si slargjave e al faseve viodi un desert di pieris fatis a tocs e di côi di tiere; no jere une sole ramascje, no une sole plante ator di lui!
Veju! Veju! Dai oms a vignivin indevant… a jerin soldâts! Soldâts talians de prime vuere mondiâl!!!
No i jere mai capitade une robe compagne: i pareve di cjatâsi dentri di un film cence vôs… al continuave a no sintî nuie… jerial a cause di chei lamps di prime? Jerial stât un fuart sclop a fâlu deventâ sort? Ma no si visave di nissun rumôr!
Nol capive nuie.
A un trat al capità alc: un fant al colà jù te buse dulà che si cjatave lui.
Chel fant si jere scrufuiât inte buse e si parave dai colps dai nemîs… almancul cussì al sameave… i colps no si sintivin però si viodevin dai lamps invistî la tiere li dongje…
Ce fâ cumò? Provâ a clamâ chel soldât? Domandâi ce che al sucedeve? Ancje berlant no vignive fûr nissune vôs e il soldât nol sintive nie. Provâ a scjassâlu? La man dal nestri esploradôr dal Cjars no tocjave nie… no jere cjar… la man no tocjave il braç di un fant talian ma… e passave… traviers une fantasime!
E pûr chel soldât al sameave cussì vêr…
Ancjemò cualchi secont e ve rivâ un altri lamp inceant e lui, l’esploradôr dal Cjars, un dai tancj turiscj de domenie, si cjatà di gnûf tal stes troi familiâr… la stesse stradelute bordade di moraruts e cisis coloradis di ros, zâl e maron. La misteriose sene di vuere si jere sfantade come par meracul!
Trop timp jerial passât di cuant che si jere inçopedât? Nol saveve. Si visave dome che par tiere al jere alc.
Al cjalà ben chel spunton… i sameave come une strane piere scure… no, no jere une piere. E alore ce jerie mai?
Alc di rusin: une sclese di granade? Al sameave fier. Trops relits jerino ancjemò sapulîts intal Cjars?
No podeve jessi une bombe ancjemò ative… al sarès za saltât par aiar…
Al jere une vore curiôs; al tacà a scavâ planc ator di chel fier cul so curtìs svuizar e in pôc timp si rindè cont che al jere… un elmet talian de prime vuere!
Al continuà ancjemò a scavâ par tirâlu fûr: un biel trofeu pe sô taverne dulà che a jerin intassâts mil carabatui di une volte!
Ma… sot dal elmet al jere alc tacât … une crepe!
di Checo Tam
#643
4 comments On Fantasimis a San Martin
Par tant che e je biele no cjati peraulis. La farine e je di sigur di Carli Pup. Ben tornât. Al jere di piêç che no ti viodevi inte ostarire.
Nello
E sal fos Pauli a scrusigna lis altis cimis? Lussian.
Mê none mi diseve: – Se no tu sês sigûr no sta impaçâti –
Ma cheste volte o fasarai l'incontrari,
Al è Carli Pup
O ai fat ancje jo chei trois sul Cjars, compagnant i fruts des scuelis. Ancje jo o sintivi alc in chei puescj, ma no savarès descrivilu. Mi à fat pensâ une robe soredut, il cidinôr dal puest.
Chel che al à metût ju cheste conte al è stât brâf a rivivi ce che al è sucedût di chestis bandis, cent agns indaûr.
Tant di cjapiel.
Mandi