O ai cognossude une siore vere…

O lavi dispès in biblioteche, a Cjarlins, ma mi sintivi bessole in mieç dai libris, chel che o cirivi no lu savevi nancje jo, cualchi volte sintivi a fevelâ par television di un scritôr e speravi ch’al deventàs il “gno” scritôr: da lis primis riis, spilucant ca e là jenfri lis pagjinis o capivi daurman se lu varès fat me o s’al restave par chei altris.
Il mont, lis storiis, i sintiments dai paîs mi àn simpri plasût, ma cuant che o sielzevi un libri in furlan, no rivavi a capîlu, cui acents che no savevi indulà fâju colâ, mi sintivi imbranade e umiliade de mê ignorance!
Fintremai che ai cognossude, la Siore Gjine: biele jê, cu la sô finece, ma soredut biele la sô anime che mi fevelave de sô vite di spose, di mari, di femine che de Cjargne e jere rivade jù inte Basse e si jere inamorade di Vilalte di Porpêt cul stes sintiment di afiet che puarte indenant pe sô Tiere. No mi pareve vere di vêle cognossude, une cussì biele persone: nol conte nuie se le ài cognossude jenfri lis riis dai siei libris, al valeve dome che e jere deventade mê, mê amie, mê parinte, in struc MÊ e vonde! Mi à puartade in cjase sô, o ài cognossût il sô om, i siei fioi, lis sôs scuviertis di un paîs diferent pai costums e ancje pal clime stes che la lassave maraveade; mi pareve di viodile, intal curtîl dal so vicinant, che e çoncjave une pivide di garofolâr par plantâlu, dopo, dongje di cjase, sperant che une dì al vès formât une piergule di colôr e di cuissà cetant profum!
Siore Gjine e je stade la prime persone che mi à fat bramâ di imparâ il furlan e par mê no je muarte parcè che nissun al mûr pardabon fintremai che al reste intal cûr di cui che i à volût ben!
di Barbara Battel

8 coments On O ai cognossude une siore vere…

  • Masse facile Barbara, Bepi

  • Bielone Barbara,tu che tu sas vuida le pene nò cu le man, ma cu le anime. Lussian

  • O bat il martiel: Barbara –
    Dome la sô pene e sa puartâti tai meandris dal cûr.

  • Cui puedial jessi tal so Carlin? No mancje nancje la biciclete. A di la veretât cheste volte nol è Olindo,ma lu stes o soi sigûr che je Barbara. La conte e je ninine.
    Nelo

  • Bielissime conte Barbara, ma al è masse facil induvinâ cui che le a scrite. Ma forsit, ancje si tu metis il non di un altri paîs, il to mût di scrivi, cussì cjapât, al pant l'autôr.
    Mandi e continue a scrivi.

  • Biele le conte, o vevi bielzà scrit il gno pinsir ma ue no lu cjati publicat
    O pues torna a diti che il to spirit plen di amor al à jemplat di gjonde il mio
    cor e jo o crot che no tu resteras mai sole , parcè che il to mut di scrivi al rive
    a jentra in te anime di ogni letor , compliments brave jo no vevi mai let alc dai tieiscrits

    Plume di Ingjustri

  • grassie a ducj e di cûr par stâmi dongje intant che o scrîf e, par te Plume d'ingjustri, une vore preseade des tôs peraulis! Cheste gnot mi 'nd à scrit il fì di Siore Gjne e mi 'nd à dît che lui e sô sûr a si son comovûts pal gno ricuart de mari. O soi ancje jo comovude di sintì che di altris a provin lis mês istessis emozions…ancjemo grassie a ducj!

  • Biele conte che e ateste l'alt nivel otignût de nestre ostarie!

    Hauptmann Thieme

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di Pagjine dal sît