Un dì o soi rivât intun paisut
suntun puartelut a jere une scrite
«Cjase di Maghe Miute,»
«Se achi tu jentris, indaûr tal timp tu tornis.»
Jo curiôs o soi jentrât,
e mi soi cjatât, intune androne scure
che di frut mi faseve tante pôre.
Cjaminant sui claps dal pedrât
intal curtîl o soi rivât
denant di chel biel incjant, mi soi fermât,
al jere plen di fruts e di lusôr,
cul côr in man mi cjali ator
A man drete a son lis stalis
parsore cul fen ben intassât, a son lis tiezis,
plui indenant une cabiute,
dentri cui cuninuts, e jè une blancje cuninute
Sot la linde une cariole di len, dute carulide
cuntune ruede di fier, mieze rusinide,
plui in font intal curtîl, doi ledanârs
Tun trat si sint une ronade,
lis razis e lis gjalinis
e svoletin scaturidis,
un mus al salte fûr de stale,
ronant al tache a cori, si bute in tiare,
si zire e si marcole al fâs dut un polvaron,
al salte e al cor come un matuçut
dopo fat il so spetacul si cuiete,
cuntune ultime rontade,
al salude e al torne dentri te sô stale
Une vecje si presente su la puarte,
«Lui cui isal?» mi domande.
Jo varès volût rispuindi,
che in chê cjase jo ai vivût
il biel timp de mê zoventût
ma o resti ingherdeât
cence vôs e cence flât.
4 comments On La cjase di Maghe Miute
Son simpri i ricuarts di zoventut a jempla le scudiele de vite cuant a sta par disvuedasi,e po dopo cui rive a scjoli"la che si nas ogni iarbe e pas". Lussian
Biele puisie, cun cualchi licenze poetiche che dut câs no fâs pierdi il gust di leile.
Mandi
Compliments al autôr, che cun la sô plume e il so ingjustri cjariât di rivocs, nus à fat jentrâ a ognidun inte cjase di Maghe Miute.
Biele.
prindi dut ai di ringraziâ il nestri Ostî pe fiduciec ch'al vût e pal timp che che al a pierdût par mê e daspò ai di ringraziâ,anonimo, jacus, e Galliano par il lôr preseament de mnê poesie un grazie di cûr a ducj voaltris