La storie da Piore Sglonfe

Tant timp indaûr, dongje il flum e viveve la Piore Sglonfe.
E veve cjatât il so puestut: un biel prât di jerbe frescje di passonâ e il flum, par podê bevi la aghe che e rivave dai monts. No faseve nuie in dute la mari dal dì. Dome mangjâ e bevi, tant che a jere deventade gruesse fûr di misure. Difati la clamavin Piore Sglonfe.
Un dì e à volût fâ un zirut, tant parcè che a jere plene e passude e cjaminant e je rivade fin dongje un arbulut. L’arbulut al jere dut content. Las sôs ramasjes a jerin plenes di ucieluts che a piulavin e che a cjantavin. E lui al jere legri di podê jessi la lôr cjasute.
La Piore Sglonfe subite e je deventade gjelose dai ucieluts. «Ancje jo», e diseve «o volarès lâ parsore da l’arbulut. Al devi sedi biel stâ parsore a cjapâ il fresc». Pensant cussì a cirive di lâ sù sul moralut, ma e faseve une fature mostre, di tancj budiei che a veve intor.
A fuarce di vites e rive a rimpinâsi sù par l’arbul. Rivade insom, l’arbul al à scomençât a pleâsi. «Smonte, piore», al diseve l’arbul, «Tu pesis masse e di un moment a chel altri mi romparai». Ma la Piore Sglonfe ai rispuindeve rabiose: «Tâs arbulut! Tu âs pûr i ucieluts parsore. Se no tu mi tegnis ancje me, no tu sês amant das besties».
L’arbulut al cirive di tignî dûr, ma al faseve une vore di fature. Ancje i ucieluts a jerin scjampâts. La Piore Sglonfe a dave cualchi scalçade par regolâsi, e ogni volte e dave di chês scjassades a l’arbul che al tremave dut.
Intant si faseve sù il timp, e tal zîr di pôc, al veve scomençât a plovi. «Judimi che o sbrissi», a vosave la Piore Sglonfe, ma l’arbul nol podeve fâ nuie. La lane da Piore a jere dute imbombade di aghe e cumò a pesave al dopli di prime. L’arbul no je faseve plui. Aromai al tirave flât a stos e las ramascjes a scomençavin a cricâ.
Ma, intun trat, dal cîl dut scûr e plen di nui, je rivade une saete che à cjapât juste la Piore Sglonfe. La sflamiade e a fat sbrissâ la Piore jù da l’arbul. E a petât un plomp par tiere e po dopo je scjampade ciulant. Di in chê volte l’arbulut al è restât un pôc stuart, ma ancjemò al à rivât a jessi cjasute pai soi amîs ucieluts.
La Piore Sglonfe je muarte sglonfe pôcs agns pui tart.
Eco parcè che cumò si taie la lane a las piores. Parcè che se a vessin di lâ suntun morâl e che a vedin di cjapâ la ploie, almancul no lu stuarzin.
di Vigji Pitoss

4 coments On La storie da Piore Sglonfe

  • La morâl di cheste flabe nus insegne a che "Mai vê gole dal benstâ dai altris". Si sa che prin o dopo ducj i grops a rivin tal pietin. Purtrop la ingordisie umane no à limits. Mandi

  • Scoltant une flabe il vin si fâs plui gustôs. Cussì cumò e larin te ostarie di contecurte plui vulintîr, sperant che il nestri Febo, dopo chê de cjavre e chê de piore us contedi flabis di altris besteutis.
    Nello Malisano

  • Fedro, domandi scuse, no Febo
    Nello

  • Vigji,biele la conte, ancje tù tu sas tropis pioris neris che corin ator e trops arbui che stuarzin,e voressin plui saetis a comedà. Lussian

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di Pagjine dal sît