La sentinele

Al impià il faro de altane inluminant la superficie dal lago.
Di gnot.
Di vuardie intun piçul presidi in Albanie, a 22 agns.
Robis orendis a jerin capitadis inte ritirade tal mieç de criure.
I uficiâi a devin il colp di gracie ai lôr stes soldâts ferîts e za mieç sapulîts tal pantan.
I grêcs no ur vevin dât tregue e cumò ancje i partigjans albanês a profitavin de disfate taliane.
Aldo al notà la aghe increspâsi: veju che a rivavin viers di lui, nadant e cul pugnâl tai dincj!
Une rafiche di metraie cuintri de aghe! 
Podopo nissun rumôr.
Ju veve netâts…
Une gnot cence sierâ un voli e, pôc prime de albe, il cambi.
“Altolà, chivalà?”
“Capomuta con cambio!”
Al jere un cuarp in rive al lago: un vecjo partigjan shqipetaro ferît a lis gjambis ma ancjemò vîf.
Il sergjent che al comandave la mude al metè fin a la sô agonie cuntun colp di revolvar. 
Aldo al cjalave chel om muart, la sô muse che e mostrave fierece e lis sôs mostacjis… no, no, a cjalâlu ben chel om nol jere vecjo: al veve massime 45 agns, come il pari di Aldo, anzi, un pêl i sameave…
Al jere muart pe libertât de sô patrie. Il so cuarp bandonât su la rive, cence sapulture.
E… se Aldo ta chê gnot nol ves fat che metraiament… jo no sarès chi a contâus cheste storie.
di Checo Tam

3 coments On La sentinele

  • E cheste e je la seconde Conte dal Contecurte day che o publichin, butade fur subit, ma une vore biele…
    Bulo, il nestri famei!

  • O ai cognossût un cjargnel ch'al jere lât aventi-jù a fâ le naie e il so marum m'al ricuarde leint chiste conte ben scrite. Juste ne piçule robute te ultime rie: "Che o chel"? Pal mitraiament. Un salût
    Jaio

  • Conte che fas pensa parsore,purtrop il valor de piel di ognidun di no al è plui grant di chel di chel altri, e no sin no a volelu, senò tant il spirt di sorevivence. Lussian

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di Pagjine dal sît