Chê robe

– Che e scusi, isal chi che si compre chê robe?
– Ce robe?
– Chê robe che si sint … a Nadâl.
– Chê di cuant che tu sês frute?
– Juste, propit chê di cuant che tu sês frute.
– Chê robe che fûr al è scûr, tor di te a son mil lûs, e che tu tu cjaminis pe strade cul fum che ti salte fûr de bocje?
– Chê robe li.
– … e chê che ti tegnin par man, tu respiris un fregul di fieste, e buine sere siôr Fredo, buine sere siore Anute, cemût vadie, al è Nadâl, voaltris ce fasêso, nô o stin cjase, in famee, a fâ fieste, e par un pôc il to mont al è dut li?
– Sì po, chê robe che par un pôc il gno mont al è dut li.
– I vadie ben ancje un pôc di frêt, di chel che al beche tal cuel?
– Ancje il frêt.
– E la spiete? I vadie un pôcje di spiete?
– Se no beche e va ben ancje la spiete.
– La spiete e beche. A voltis e beche fuart. Puedie lâ ben?
– No sai… che e fasi jê… se po o soi contente, alore sì, che me dedi.
– La spiete le din simpri cul pôc sium. E cui pinsîrs di frute, chei che a somein grancj ancje se a son piçui piçui.
– Bon pal pôc sium e pai pinsîrs. Cumò o soi grande. Ce puedino fâ i pinsîrs piçui piçui?
– Ju involùcijo ?
– Nol covente.
– Ve ca. Che ju tegni ben e cun rivuart.
– Sigûr. Cetant aio di dâi?
– Un pinsîr.
– Un pinsîr? Ce pinsîr?
– Usgnot, tal pôc sium, un pinsîr piçul piçul.
– Il plui piçul?
– Il prin di ducj i pinsîrs.
– E cuâl?
– Il pinsîr “Duâr e sta contente”
– Va ben, o provarai.
di Mariute

6 coments On Chê robe

  • Mi soi scjadidis lis mans i pits e il cûr. Mariure met su un altri len che mi senti ancje jo. Graciis e bon Nadâl

  • Mariute, a tu âs scrit une poesie in prose…la plui biele conte di Nadâl.. Bepi

  • Graciis Mariute par fânus capî cun la tô conte, ce tant biel che al è sintî dentri ni nô la magjiche atmosfere nadaline, ancje par chei che o vivìn oltran la Piçule Patrie. Par fortune “Lis lidrîs no dome nus nudrissin ma ancje nus sostegnin”.
    Maman

  • Tu mi as fat riviodi ches cartulinis di augurs, che corevin nocentes i agns cuarante prin e poc dopo,che cjasute sepulide da nef tal bosc, cul balcon cal lassave viodi, une lus cjalde,un camin cal fumave, e dut al poiave chel calor jenfri il cur.Biele conte cun tant sintiment uman intor. Lussian

  • Al è stât par me un Nadâl speciâl e cumò che mi soi cjatade a lei i vuestris coments te Ostarie la sensazion di gjolde si è parfin amplificade. Graziis e auguris di tante serenitât par l'an cu ven a ducj!
    Mariute

  • Grasie, grasie, grasie, mi par di sedi tornade tai ains di quant che o eri picjule…mi par di viodi neveà e duç indaffaras e tal stes timp calms….a gjoldi chel moment dal Nadal.
    Rosanna

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di Pagjine dal sît