Avilît, Sergj al cjaminave planc planc intune di chês stradis plui internis rispiet a chês che passin tal mieç tal paîs, indulà che cjatâ un cristian al è plui dificil che viodi un cjan inte glesie.
Sô mari e so pari e jerin muarts di un pieç. Amîs ‘nd veve nissun, un pôc pal so caratar, ma ancje parcè che une volte tornât di militâr, cui par une femine, cui pal lavôr, cui invezit parcè che plui il timp al passave e plui al deventave cagon a jerin sparîts. Insome ju veve ducj pierdûts
Cu lis feminis, lu stes, nol veve vude tante fortune. A part Glorie, che putane di Martignà che cuant che al lave a cjatâle, su chel jet simpri ben fat come Diu comande, no dome lu faseve gjoldi cul so cicin, che ’nt veve tant, ma i regalave ancje un fregul di cûr. Fat chest che al jere ce che no i faseve pesâ chês dôs cjartis di dîs che ogni volte al veve di lassâi. A dî la veretât, plui voltis al veve pensât, che se no fos stade une putane e sarès stade le uniche femine che al varès vulintîr maridade. Ator ator, in chê dì, la fumate e jere tant penze che al someave e vês glotudis lis cjasis e lis stradis e che dut il mont si fos fermât.
Ma indulà al levial Sergji in che brute zornade? Cui sa, forsit no lu saveve nancje lui. E jere domenie, e al cjaminave des bandis de glesie dal Sant dal Paîs. Salacor al sperave che in tant cidinôr, fermantsi fûr di chel lûc sacri di podê scoltâ chei cjants che a jessevin di dentri chei mûrs. I plasevin une vore e di spes si fermave a scoltâju ancje se i fasevin tornâ in inment cun tante nostalgjie il ricuart dai timps de sô zoventût, cuant che ju cjantave ancje lui.
Dopo chês pagjinis che al jemplave ogni dì cul ingjustri, scoltâ chês vôs che i tocjavin il cûr e jere la sô plui grande passion.
Ma in chê dì e jere propit une brute zornade. Colpe di chê fumate che e veve fermât il mont Bepo, Meni, Marie, Sandri, Rosute che a vignivin cuasi ogni dì a cjatâlu, cualchi volte barufant, par fâsi meti dentri ancje lôr jenfri lis pagjinis di chel lunc libri che di une vore i timp al scriveve in chê dì no si jerin presentâts nancje lôr.
Une zornade propit grise, tant disgraciade che ancje i unics bregons che no i strenzevin la panze, cuant che ju veve metûts intor, la lôr cerniere si jere rote.
Ma là jerino lâts che siei unics amîs che e vignivin a cjatâlu saltuçant, ‘mò ridint, ‘mò vaint su lis riis di chês pagjinis che ancjemò al veve di jemplâ?
In chê dì l’unic che si jere presentât al jere stât Risieri che cun di plui i jere passat denant dai voi cuant che fûr de glesie si jere acuart che lis puartis di chê plêf a jerin sieradis. Si che brâf om che si jere picjât sul ramaç plui bas dal cacâr.
No no, ancje se al jere un brâf om, cun chê cuarde tal cuel e cun dute che malore che lu veve fat deventâ mat e che jere ancjemò scrite tai siei voi nol podeve metilu dentri tal so libri.
“Ancje se di vîf al jere un bon om e i volevi tant ben o ài di parâlu vie dai miei vôi, si diseve Sergji.” Miôr che si pierdi ancje lui inte fumate.”
Fossie stade vierte almancul une ostarie, ma di cualchi an, dutis lis fiestis, magari cussì no, tal paîs, a jerin sieradis ancje chês.
di Nello Malisano
#501
12 comments On Ce brut restâ bessôi
Biele storie Nello.
Un quadri di vite ben piturât.
Pauli
Nelo. la conte a è ben sentade sui dis dal nestri timp corint, la solitudine je cjative compagnie,e par chest no o vin di tigni dur, e fruia lis suelis das scarpis sui scjalins de cantine,e bala a la musiche che il spinel da bote al fas tal vierzilu,e gjoldi di che colade che va a sdrumasi tal font dal bocal ricamant che biele brume ciacarone. Mandi Nelo. Lussian
Graciis a Paluli e a Lussian. A al è biel vignî in te ostarie di contecurte e bevi un tai cun vuatris; sintî i vuestris preseaments e infin lei les vuestris simpri bielis contis.
Nello Malisano
Nelo, s'a tu savessis ce tante fumate ch'a 'nde ca vie pes stradis dal Piemont, ma a mi somee ch'a sedi un grum di plui tal cjâf di cualchi sfolmenât ch'al zire atôr pal mont. Ce podìno fâ? Bepi
Bepi tu âs reson. Cheste volte no soi, par dile come te, sfolmenât su une des stradis che mi puartin ator pal mont. Tant mancul mi è passât pal cjâf un ricuart legri, o une flabe di oms o feminis cu la muse di ridi. Ma il nestri Friûl che contin al è fat ancje di chestis storiis. Cheste che o ài contade cheste volte e je la storie di oms che o ài cognossût pardabon. E mi à fat plasè ricuardâju. E se ti ai metude malinconie ti domandi perdon. Ma si, fâs ancje tu cemût che al dîs Lussian. Fruie lis suelis das scarpis sui scjalins de cantine. Là a Torin un bon barbera nol mancje e bêf un tai ancje par me. Jo o bevarai, chi a Palermo, une butile di neri d'avola par te. Mandi
Nello Malisano
Nello,
L’om par nature al à bisugne di compagnie, se no le à al po ancje inventâle, come chei amîs virtuâi di Sergji che lu visitavin ogni dì a traviers de sô scriture. La fumate, e va ben come metafore di sierade, che no permet viodi nissune pussibilitât di jessi di chel circul ermetic, come il puar Risieri che nol rivà a saltâ fûr.
Purpûr un lusorut di sperance si varès simpri di rivâ a viodilu. Baste che no si sieri ancje lui come lis ostariis in Domenie.
Une conte par pensâ.
Nelo, i sfolmenâts cu la fumate tal cjâf ch'o fevelavi jo, a son chei mats di Parigj, Il to Risieri al à dute la me comprension. Bepi
Biele conte cuntun vȇl di maluserie.
La vite e je fate di tancj colȏrs, a voltis grise come la fumate.
Mandi
Egle T.
Vere, Siore Egle, la vite e je fate di tancj colôrs e non se podin contìnju ducj. Graciis pal preseament. e graciis ancje a Galliano simpri presint cu li sôs savis considerazions.
Nello Malisano
Ancje a chi tal Nestri Friûl, ce plui ce mancul, di cuindis dîs le fumate si e imparonade scurtant cusì le nestre visuâl…
Chei dîs ca o volessin ve ducj une fumate che nus platàs ce cal e sucedût in France. I diaul, dut vie non si po scuindi, le solitudin di un pari cai rive la brute gnove che so fi, magari il so unic fi, al e stât copat cence une reson, no si po descrivi… di sigûr ai restarà une malinconie fûr di misure. Mandi de bande di Maurizio Di Fant
Ancje a chi in Moselle le fumate si è impastanâde di plui di cuindis dî.
Jo o bevarai un bourgogne a le to salût e ancje a le me. Mandi!!!
vêr cjatâ un cristian al è dificil, e son diventâs dut musulman. Mandi Nello une bussade!!!