Leviathano!

L’aiar fresc al rint pure la mê anime. A tornin fûr i antîcs sflandôrs. Il mâr. Il mâr tant che un neri Leviathan che al assalte la cueste. Nûi grîs dal Apocalìs. La citât ti samee imbumbide di straniis presincis. Come se i oms a sedin minaçâts di fuarcis che no si cognossin…

O soi chi in rive al mâr ma no rivi mai a cjatâ chê cjase… chê cjase dulà che o jeri stât di frut… e jere intune sorte di terace sul mâr; une palazine a doi plans… su lis pieris cualchidun al veve pierdût une bale di tennis, o intint su chês pieris mitudis apueste par contrastâ lis ondis. E dopo te pension di front a la nestre… chês frutis, chês frutis che a cjantavin cussì ben prime di indurmidîsi… e chel parchegjo cu lis machinis… une machine sportive, blancje e chel scarabeu stercorari che al cjaminave tra chei scjatolons di fier cence curâsi di jessi sfracaiât se si fossin movûts… tal soreli di une astât di tancj agns fa, di tancj agns fa…

Ce tancj agns che a son passâts… dulà ise Pamela? Dulà sono chês frutis? Dulà ise chê rufiane cul vistît zâl e blu che e judave i siei intal bar dongje de splaze?

A son dome tai miei ricuarts, in cualchi cassetin te mê ment… e devant di me simpri chel mâr, tant che un neri Leviathan che al assalte la cueste. Vuê, vuê come ta chê volte.