CCaSZ – A savê contâle

E ven la ore di sparniçâ la tierce serade di Ce Contino a San Zorz!
Aromai la formule e scomence a jessi rodade… Inte locandine chi parsore o viodês nuiemancul che la cariole des contis, che aromai e compagne l’ostîr e condutôr fin dal imprin. 
Come par solit, MIERCUS 7 DI OTUBAR, tor 8 e mieze sot sere, li de biblioteche di San Zorz, a Villa Dora, inte sale des conferencis, si davuelzarà la serade di narative curte e lenghe furlane.
Il teme de serade al è “A savê contâle” ven a stâ ce che si à di pensâ dopo vê imagjinât une conte di contâ e prin di tacâ a scrivile. 
Ce sucedarajal inte serade? 
Tant par scomençâ sperin che no passin par li personalitâts di cualchi materie strane, ma se al sucedes, o savin aromai che la domande che l’Ostîr i fâs e je simpri châ: parcè scrivi contis curtis par furlan?
Dopo di chel, ce che nol mancjarà, a saran lis contis curtissimis, lungjis anche une frase sole, che nus leiaran i doi letôr fis, famei e berlon de ostarie, Checo e Michêl, Un scritôr e cjantant, chel altri atôr dai Dret & Ledrôs di Glemone. O puedìn dî ancje che jessint l’ospit de serade Fulvio Romanin, cu la presentazion dal so ultim libri “La stagione della muta”, lavôr cuntune venadure une vore “nere”, a saràn letis plui di cualchi conte “pulp”… o sês visâts. Parfin la conte pulp plui curte dal mont.
La companie musicâl e sarà come simpri a opare da In 2 rive no tocje, che us metin chi inte performance di îr di sere a Cormôr Salvadi.
Pe rubriche “La conte misteriose” si tacarà cuntun autôr une vore nomenât, che us sigurìn par furlan al rint une vore ben. E par la rubriche “Voltâts par furlan” o vin une biele conte di fantasience, che i nestris contecurtârs plui fedêi a cognossin za. Insome… se o podês vignî, vigneit, che a zire vôs che al sedi ancje un got di bevi.

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît