Al veve un cuarp ma si sintive un spirt e nol rivave a tocjâsi. Al veve il cuarp de sô ultime vite… caucasic di raze… vivût tai prins agns dal XX secul, muart a vincj agns tes trinceis de Vuere Grande.
Cumò al jere al cospiet di Diu… se al jere Diu chel argagn smisurât… dut plen di… ce jerino? Cristai? Grancj cristai di un blu profont e luncs centenârs di metris.
La vôs, une vôs profonde, come il sun… no, come il rumôr di… un canon lontan… no… come un aiaron? No… ma e jere une vôs… e forsi e jere dentri di lui…
“E alore, cumò? Dulà ti plasaressial lâ? Sielç une cualsisei forme di vite e une cualsisei galassie… dulà? Achernar? Un fonc di Achernar 4? Un simbiont di Ras Algheti 5? Alc di extragalatic? Disimi pûr… e jo ti fasarai tornâ a nassi… dulà che tu vûs.
E lui nol ve dubis e al rispuindè: “Ti prei di fâmi tornâ a nassi tal 1898 su la Tiere, inte regjon clamade Friûl ma… cheste volte no mi fasarai freâ e o fasarai l’imboscât.”
di Checo Tam
#479
2 comments On Reincarnation
Mighe tant bon chel pari eterni di cristal li, din prin a lu mandave a fâ il fonc tun lûc là ch'a i vignive inzirli a pirlâ a chê velocitât li, cul risi di fai semenâ lis sporis ator pe galassie, e po dopo a fâ la simie ta un puest là ch'a no si cjatin bananis di mangjâ, ma dome int a 5 stelis; se cheste e je la justizie divine…….miôr la sielte dal Caucasic…Bepi
p.s. Checo, a mi à vignude un pôc ermetiche…
Ermetiche o emetiche?
Insome… a son ducj i professoroni, i sapientoni e i soloni che a berghelin su la Vuere… ducj a disin alc e jo o ai dit la mé….
CT