Al jere un Istât che al brusave lis pieris e nol lassave recuie, jo o jeri distirât te ombrene dal bearç cu la lenghe di fûr e lis orelis a pendolòn che o spietavi che tu tornassis de vore. Un Istât cussì nol jere mai stât che jo mi ricuardi.
Scaturî dal cjalt, come flamis di fûc tal aiar, il flum in secje e i claps che a scotavin sot dai pîts, la jerbe brusade dal soreglon e il bosc che al fumave e il cjamp plen di crituris, come lamis di fier te anime dal om.
Jo o pensavi: “Isal il cjastic di Diu pai oms par vê invelenât e intosseât la tiere?”
Ancje i uciei a tasevin e a lavin a cirî un pôc di ombrene, dome la cjale si sintive dispetose cul so cjant che mi zimiave tes orelis.
Si spietave e si bramave la ploie e un pôc di fresc.
Re Toni, il gno paron, jo lu clamavi cussì parcè che par me al jere come un “re“,
i volevi un ben de anime, o sintivi cuant che al rivave tal borc cu la sô machine,
o cognossevi il rumôr dal motôr, o scomençavi a menâ la code e o corevi sul porton.
Lui mi vignive dongje e mi faseve une cjarece sul cjâf . – Oh, ce emozion! –
Di disfâmi dentri, mi lusivin i voi. – Dai! – mi diseve – Ven ca! – E mi dave une pache su la schene. Re Toni al jere il miôr paron che o podès desiderâ.
Cussì come simpri lui mi veve preparât une buine cene, une vore buinone e bondante, o vevi mangjât propit come un re, passût e content.
Il soreli al tramontave, come une bale di fûc tal cîl, une maravee di viodi.
Re Toni mi veve dât une sivilade e mi veve clamât: – Dai! O lin a fâ un zirut. –
Jo o soi lât di corse, come une saete e o soi saltât su la machine.
Mi cjalavi ator e o gjoldevi a viodi chê bielece, Re Toni al taseve, al vuidave e nol cjantuçave come par solit e jo o pensavi che al fos strac de vore.
La strade no jere chê cognossude ma lungje, lungje , drete e asfaltade, ogni tant a passavin camions che nus vignivin dongje e mi fasevin pôre.
“ Dulà lino? – O pensavi… Intun colp di frenade, devant di un fossâl che manculmâl che al jere sut, cence roie ni pantan, Re Toni mi veve viert la puarte de machine, jo o jeri saltât jù e lu cjalavi e o menavi la code crodint di lâ a passon pai cjamps come simpri, ma lui al zirave il cjâf di une altre bande par no cjalâmi, al montave in machine e cuntun fracàs che mi stropave lis orelis al meteve in moto e al partive di corse come un lari in fuide.
Jo no crodevi e no imagjinavi che al podès fâmi chest. – Ce figure di om!
– Ce vergogne, di lâ a platâsi …! Jo no lu varès mai tradît cussì ! O soi restât li tal fossâl come un puar cjan bandonât. Aromai al jere scûr, o cjalavi il cîl e lis stelis e o vaivi lagrimis di cjan par un om cence cûr ni anime.
di Egle Taverna
#472
7 comments On Storie di un cjan
Biele conte, un bile furlan che al sbrisse vie ben. Pecjât che no met ligrie, magari cussì no e je une brute veretât. E ben vignude in contecurte a la siore o signorine Egle.
Siore Egle benvignude a Contecurte, la sô conte mi à plasût unevore, ancje se purtrop e mostre metiint in rilêf un dai tancj difiets umans.
O vuei ancje dîsi che "navigant" te virtualitât o vei il plasê di sintîle recitânt: "Profum de fraulis, Claps e Mai plui vuere."
E come che al dîs: Laurin Zuan Nardin
"Une vôs poetiche di preseâ, in plui che par siei merts, par vie che e je feminine"
Le saludi
Une vore, graziis a Nello e Galliano, pal preseament de mȇ conte, ancje se e fȃs viodi une crude veretȃt, ma e pol servȋ a movi lis cussiencis. O ai agrȃt di jessi jentrade a fȃ
part de biele e vivarose famee di “ Contecurte” là che si puès scrivi e pensȃ par furlan.
Mandi a ducj,
Egle
Compliments a DONE Egle pa so conte pedagogjche,ricje di sintiments educatifs metuts ju cuntune sensibilitat umane che speri rivi a fora il corean dai curs plui durs.Brave e baste. Lussian
Sint ca mo Egle, o soi stât in vacance in tune valade dal Piemont ta un albierc par curis termâls, plen di vecjuts ben sintint, ma ducj cul lôr cjanut ca lu puartavin fintremai te sale di gustâ, e o stenti a crodi che che Re Toni ai vedi fât che robe li al so cjanut. Disimi ch'a no je vere e che Re Toni al à scugnût lassâlu parcè che al jere malât e nol podeve plui tignîlu cun se. Bepi
Mandi Pepi,
a son tancj par fortune che a vuelin ben ai lȏr cjanuts ancje miȏr dai cristians, ma la conte e trate de malusance crudȇl di bandonȃ i animȃi tal timp des vacancis.
Purtrop a son ancje tancj come Re Toni che si liberin dal pȇs ingombrant di “ Fido” o “ Fuffi”, cjans e gjats, soredut di istȃt. Se Re Toni al fos stȃt malȃt, il cjan nol veve nissune colpe.
Cun vive cordialitȃt
Egle Taverna
Egle, lant indenant cui agns a si devente plui "dolçiûs" di cûr, a si torne fruts, e si vores che dutis lis flabis e ledin a bon fin. Invezit, magari cussì no, a nol è simpri cussì. Bepi