O disarês che o voi simpri a finîle li cu lis mês contis ma i furlans a fevelin simpri di chês robis… il lavôr, il modon… e do po no ano simpri chês stessis passions? Il balon, la cjace, il vin e… la parussule!
Alore us conti dal gno amì Remo. Une dì al jere lât pe prime volte intun nait. Lu cjapavin par “basiù” e par “velu-velu” ma in realtât al jere plui babio di altris… e ce figurin! Cu la mude di fieste, su misure, i cjavei cu la rie in bande e a caschet a tipo beat, a ûs chei famôs peruchîrs di Londre… chei là mo… chei che a propagandavin la lache Cadonet… sì… i fradis Bundy…
E alore al jere lât ta chel nait che al jere intune biele vile cun zardin. Savêso chel stîl a ûs i prins dal ‘900? Un stîl comun a tantis vilis furlanis… a disin liberty, cussì mi à dit gno nevôt. Fûr, suntune terace i parons a vevin posizionât un biel reclam: un manichin di boutique cu la peruche bionde e un lizêr vistît ros, po, ce altri? Alore une volte lât dentri Remo si intive intune di chês signorinis di vincj agns plui zovine di lui che al veve sorpassât i cuarante. La more, une sud-merecane cun sanc indio lu veve cjareçât e stiçât e lui i veve paiât la butilie ma migo al jere “Vevclicò” o “Krug”? pitost aghe sporcje cu lis bufulis, colorade di zâl a ûs pissariti, gazose po…
E cussì a jerin lâts tal separé e lui si jere fat fâ la vore. Dopo vincj minûts al jere rivât un omenat a disi che Remo, par continuâ la vore, al varès scugnût molâ plui bêçs e che za al veve di dâ fûr ben cent mil francs che, ta chê volte…
Poben Remo, che nol veve ancjemò paiât la butilie e al veve vincj mil in sachete, si jere spaurît e al veve ben pensât a un truc. Alore al jere lât tal cabôt e li, sec candît come che al jere tant che i fantins dal palio di Siena, al jere rivât a scjampâ par une strente barconete… e jere pôc plui largje di une fressure…
Ve alore che trente agns dopo, intune cjalde dì di avost o soi lât a cjatâlu che a jerin agnorums che no lu viodevi, puar Remo… te cjase di ricovero lu àn mitût, e li si môf o cul boston o sul birocin… no mi imagjinavi che al finìs cussì, avonde zovin si fâs par dî ma a cjase di so zinar no podevin tignîlu e dopo di chel ictus… sì, insome, al jere un pês. Mi à dit che al sta ben e “Milio, cjale ca ce bielis infermieris e cumò no ai bisugne di scjampâ pal barcon… di ca no mi sposti…”
Ah, no us ai dit che la biele vile cun zardin che intai agns 70 e 80 e jere un nait… be, dopo un lunc periot di abandon e je stade trasformade intun ricovero! Veretât! Veretât!
di Milio dai Cjans
#461
6 comments On La vile
Milio al va simpri a fevelâ di pantianis… almancul ultimamentri… ma no si capìs parcè che nol interven scuasi mai a comentâ… forsi nol è bon di scrivi sul computer?
Uhm…
Firmato non Diaz ma abate Faria(z)
Milio, cjalant la foto a mi ven di dî che Vile di prime o ben Vile di dopo, la vite e je simpri tacade a un pâl…Bepi
Plui che al pâl miôr al baston.. Bepi
dis -pò milio, ma remo cemut la metevie prostatat come cal jere
Parmi al jere miôr il Friûl di une volte cuant che i vielis a stavin cjase e i zovins a levin tai nights… cumò o sin mâl mitûts…
CT
Nie, o volevi dome visâ i nestris contecurtârs e ducj chei che a intervegnin che sabide 18 di lui, inte arie ex tiro a volo di Bagnarie dongje Palme, cun inizi a lis nûf di sere e je la fieste/conciert Viva Onde Furlane, cun diviers artiscj tanche Carnicats, Claudio Cojaniz, Volvodrivers, Daisy Chain e altris. Fasêt un scjampon par sustignî la nestre radio che e à ancje dedicât oris a la difusion di contis che a son publicadis te ostarie!
CT