(traduzion dal globish anglospanosinoarabon)
Xric: Sâstu la novitât?
Xrac: Ce?
Xric: Il gno gjenitôr nr.1 si è fat traplantâ une gnove tete!
Xrac: Parcè po? No pensavi si doprassin plui… aromai…
Xric: Al à di dâ di tete al gjat, o miôr al Ozelot dal Ucayali… il gno GJE1 al preferìs il metod naturâl…
Xrac: Ce tipo stravagant… ma, o crodevi che l’Ozelot nol esistès plui…
Xric: GJE1 a ‘nd à cjatât un tal zoo de favela di Amazon City… I è costât 3000 credits selenics… il cost di une vacance su Vesta…
Xrac: Ah, la fasse dai asteroits… no sta dîmi… ce balis… jo chel altri an o jeri su Caronte e mi soi divertût… a part il fat che a jerin dome forescj a vendi robe… sâstu chei symbionts di Alpha Centauri che a continuin a rivâ…
Xric: No si pues plui… sperìn che i oligarcs a fasedin alc cuintri chei li… va no va che no nus invadin dut il Systeme Solâr doman passant doman… a propuesit, e il to GJE1?
Xrac: Il gno si è separât…
Xric: Mi displâs…
Xrac: Ma… nissun probleme… GJE2 al sta miôr bessôl e GJE1 al à un gnûf compagn…
Xric: O ai gust… ce compagn isal?
Xrac: Un cjan…
Xric: Un cjan? Ce schifo! E se i caghe tal liet?
Xrac: Mateistu? O vin i liets cu la systeme automatiche di smaltiment stronzui… no sin migo indaûr!
O sarês curiôs di cognossi l’aspiet dai doi amîs: a àn la piel ulivastre e i cjavei di mil colôrs. Dut il cuarp tatuât e plen di piercings; a zirin in crot ma tant su la Tiere dal 2555 al fâs cjaldon e daspò… se al ves di fâ frêt (câs râr) al esist un argagn che al cree ator dai umign, des feminis, dai trans e dai ybrits un cjamp di energije par riscjaldâ tal ragjo di doi metris. Lassìn i doi amîs ai lôr afârs e tornìn al 2015… cuntun suspîr di solêf?
di Checo Tam
#468
4 coments On Dialic intal an 2555
Checo, dulà vâstu a cjatâlis. Ti ispirie il spirt di Julius Verne? Bepi
Checo cun chei sovoltaments di vite dai gnestris dis no mi maravei ca divegni realtat .
Si, si Checo, une biele fantasie la tô. Ma par plasê tornin tal 2015, che a part il fat co vin bielzà robis che nus coste adatânus, figurâsi po ce macel che al sarès tal 2055. Jo mi fermi ca.
juste apont… al sarà un càs… o stoi rileint 20000 leghe di Verne…
CT