Pocis

Mi cridin simpri, a cjase, parcè o ai pôre des robis dulà che no si cjale dentri.
Ma jo une volte o ai bevût un raiat, te scjate dal lat, e cumò o vuei bevi dome tes butiliis di veri. 
Parfin lis pocis mi spaurissin: o pensi simpri che si podarès lâ sot fintremai a finîle tal mieç dal mont. 
Inte strade blancje o vaivi. Il pai, inpins jenfri dôs strichis di aghe maron, mi clamave vaios. Di bot al è saltât fûr un madracat grandonon, plen di mostacjis finis finis. Lu à muardût e striçât come un tubet di dentifrici. Al leve fûr e dentri des pocis scjassant il cjâf e dapardut a colavin toc di pai. Le bestie e tornave daûr e e finive di mangjâiu. Però è someave dute a Tatsu, il gno dragut di peluche, e cussì ae mame no i ai dite nuie.
di Raffaele Serafini
Contis dal ostîr

8 coments On Pocis

  • Sureâl… o soreâl? / CT

  • Ustie ostîr, nuie scjatulis sieradis, butiliis scuris e pocis cence fonts. Brut vivi ta un mont plen di fumate e aghis torgulis! Bepi

  • Une vision fantastiche di un Tatsu che par difindi il frut al fâs fûr il pari.
    Par gno cont Tatsu al umanize la conte. Une conte verementri curte ma cun tante tele di podê taiâ. Biele

  • Checo! il soreâl fin chê altre dì no savevi nancje ce che al jere, peraule che e va pierdude, pûr trop 🙁

  • In efiets a son milante peraulis che a van pierdudis… par furtune che a son i vocabolaris. Mi visi che mê none maternÆ e doprave une peraule al feminin par chei conis blancs e ros che si metin i strade cuant che si piturin lis riis blancjis; e diseve… "E àn mitût les XXXXXXXXX"… se cualchi espert si vise ce tiermin che al podve sedi che mi fasi savê… /CT

  • Po stai ch'a sedi la Mitrie, da la forme dal cjapiel dal vescul. Bepi

  • No pensi… al jere alc di plui … furlan… CT

  • Agne Lene a disarès:Bielzà da fruta, al mi someava di viodi cocodrilos tar dutas las poças. Il biel al é ch'in d'ai viodût inmó un ch'a nol é tant e chesta conta mal à fat tornâ in ment.
    Mandi
    Jaio

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di Pagjine dal sît