Il televisôr

Dut in blanc e neri… e che e jere la Rai! Il Lussemburc in ros e la Italie in celest… morâl… a jerin ducj in grîs sul scherm… e someave une partide di rugby! Il cronist talian al disè: “Potete distinguere i giocatori lussemburghesi dalle righe sui calzettoni…”
“Buine gnot!” al disè Lido. Po al cambiâ il canâl de vecje Telefunken metint su Cjaudistrie… si viodeve la stesse partide ma a colôrs!
I aventôrs de ostarie a jerin contents però Lido al pensà che al veve di partâ al plui prest la television intune stanzie privade e fâ jentrâ la int in amicizie… par no paiâ la tasse… za al scugnive paiâ il canone… par viodi lis partidis in blanc e neri!
“Cemût mai chei comuniscj a àn il colôr? A son plui indevant di nô…” i disè Fredo.
Il mestri Zuan al intervignì: “Ce crodistu che a sedin indaûr? Cjale la Russie… e je stade la prime a mandâ un missil intal spazi ator de Tiere…”
E Fredo: “Ah, e je vere ma… inte Lune no sono lâts prime i merecans?”
Zuan al ribatè: “Chê e je vere… ma… a àn sigure copiât dai rus, ce crodistu!”
“E parcè, i comuniscj ce crodistu, che no vedin cupiât ancje lôr?”
“E di cui, eh, di cui varessino copiât?”
“Ah, no sai, no nus vegnin sigûr a dîlu a nô… ce discors…”
“Ma va, là, va là, gleseot dal ostie, se a fossin ancje nô cui comuniscj cumò o varessin ancje nô il colôr!”
“Sigûr po! Ce colôr e colôr, dome il ros nus lassaressis viodi, voaltris… altri che balis!”
In chel la Italie e jentrâ in aree cun Boninsegna e e otignî un rigôr, ancje se aromai la croniche e jere tabiade des vôs di Zuan e Fredo, 
“Taseit, cancars!” i businà Lido, ma nuie di fâ, i doi a levin indenant a tichignâsi. 
In chel si jevà sù Tilio, che al jere un omenon grant, lavoradôr, che al cjacarave cussì pôc che tancj lu crodevin mut. I molà un scufiot a Zuan a man drete, un ledrôs a Fredo, intune sorte di compensazion balonarpolitiche che e puartâ il cidinôr propit sul moment de esecuzion. 
Ancje agns dopo, a lâ a domandâi, sedi Fredo che Zuan a si visavin de partide, ma nissun dai doi al saveve se il rigôr al jere stât segnât o mancul.
di Milio dai cjans

20 coments On Il televisôr

  • Milio, a no ti vegnie di ridi dome al pensâ che i talians a si pestavin tra di lôr par sielzi i lôr sorestants forescj, di pissâsi intor. Bepi

  • Bielissime!
    Rossella

  • Mi à plasût unevore, soredut il contest situazionâl. Brâf.

  • Mumble mumble, Milio, la conte e je spiritose ma no crodevi che Boniperti al zuiàs fin al 1970, cuantche i Yankees a vevin za concuistât la Lune… chi al è alc che nol torne tal cjamp cronologjic… si fevele ancje di agns 50 e ta chei timps no vevin nancje fat lis mission Gemini! Bastarès cambiâ Boniperti e meti Mazzola o Anastasi, Rivera, Riva, picchio De Sisti, Boninsegna, Domenghini, Rivera… si sin capîts, no?
    Firmât il Censôr Checo!

  • O zonti ancje che la vecjae e fâs bruts scherçs, Milio… par mi tu ti confondis… si lu sa che i vielis a messedin simpri i ricuarts… bastarès dome tornâ a tirâ fûr cualchi vecjo album di figurinis Panini… ancje chei ristampâts grazie al bon Water Veltroni cuantche la dirizeve L'Unità dai agns 90…

  • Checo, jerial intenzionâl chel "Water" Veltroni ch'a tu âs scrit? Jo m'al ricuardi come il diretôr ch'al à fât falî il gjornâl. Tal merit: par gno cont la storie e je une vore divierse de conte; pe storie covente lâ daûr de cronologjie, là che invezit la conte e je fûr dal timp. La conte di Milio e à masanât la cronologjie ( TV a colôrs in USA – 1954, Gjermanie e URSS – 1967, Cjaudistrie – 1971, Italie – 1977, Boniperti al puest di Rivera e Riva cence nissun rigôr te partide Italie – Lussemburc 5 a 0 dal 1973 e ta che dal an prime 4 a 0 dal 1972) ma e à fât saltâ fûr benon la lote jenfri blancs e ros di chei timps là vie. Po dopo a tu âs reson tu cuant ch'a tu disis che i vecjos come me, a dismentein dut come che àn fât Fredo e Zuan sul rigôr. Ma lis veris contis a son propri chês dai vecjos, parcè che chês dai zovins a son cronichis. Bepi

  • su consei di Milio o ai cambiât Boniperti in Boninsegna, che al è plui just. 🙂

  • e o zonti, che ancje a mi, no mi cuadrave dut cu lis datis dal balon, e graciis a Bepi par vênus dit la cronologjie storiche. I ogni câs conte gustose! (mi pareve di jessi li te ostarie!)

  • e cumò Bepi nus pues fevelâ dal lunochod, ven a stâi dal pre Pathfinder sovietic dal 75! Forsi no ducj a san che ancje i Rus cuntun cingulât a son lâts su la Lune!!!!!!!!!!!!!!!! CT

  • Water al jere di pueste

  • Viodìn, a memorie e cence cjalâ tal Interdèt, cemût che e podeve jessi la Italie di chel 5-0 cul Luxembourg… tignint cont che la Juve dal 73 e veve vint il scudet… Zoff, Spinosi, Facchetti, Benetti (Furino), Morini, Wilson; Causio, Capello, Chinaglia (Anastasi), Mazzola, Riva… CT Valcareggi. Ora sta a voi… se sbaglio mi corrigerete! /CT

  • Milio, cui doi cantins plui cjars a talians, balon e politiche, a tu âs stiçât une biele rebecade, une vore gjoldibile. Contecurtegnove al è un dai blogs plui partecipâts dai contecurtârs, graciis a ducj e mandi a pape Checo. Bepi

  • Orpo, ce gust! no mi visavi propit nuie de part calcistiche e o ai di dî di vele un pocut inventade, su ce che mi visavi, ma us garantis che la scene e je capitade pardabon, pe part de cuestion dal batibec ros e blanc. Grassie a ducj pal preseament!

  • O orès propit voie di savé cemùt che al faseve il modul che al tignive il Lunochod a alunà cence sfracaiàsi… no jessint un pilote militàr alì… fasevino dut di Tiere i Rus? Cemùt rivavino a fà aterà il modul su la Lune dal 1975? Jerino cussì indenant? O jerie dome propagande?
    CT

  • Checo, a tu sês un biel curiôs, jo a no soi un astronaute ancje s'a mi plâs l'astronomie ch'a je une altre robe, ma a mi par di capî che Lunakod 2 e je stade puartade din prin in orbite terestri con tun missil vetôr e po dopo ator de lune de bande de sonde Luna 21 ch'a veve ducj i imprescj par pilotâ l'alunagj dal Lunakod. No coventave nissun comant de bande de tiere. I Rus a volevin capî s'a si podeve meti un osservatori astronomic su la Lune ch'al sarès stât une vore vore miôr dal Hubble in orbite spaziâl. Dutis robis letis su Interdet. Bepi

  • Alore la Luna 21 e jere une sonde robotiche… cemût fasevie a vuidâ cussì ben l'alunament dal Lunochod se ta chê volte i robot a jerin robe di fantasience? O jerin tai agns 70… e i merecans a vevin dai militârs a vuidâ il LEM cuant che al leve jù… uhm… /CT

  • Ah, la formazion juste di chê Italie dal 73 e jere… Zoff, Sabadini, Facchetti, Benetti, Spinosi, Burgnich, Causio, Capello, Anastasi, Rivera e Riva. Chest al à fat 4 goals. In bancjine a jerin ancje i toriniscj Sala e Pulici, jentrâts ancje lôr in cjamp. CT… Ct lu ai dit Valcareggi

  • Bepi! Ti mandarès sù te inte ISS cu la Cristoforetti! Tu sês un drago! Jo, dal cjant gno, o larès là sù se magari mi metessin cun la Brigitta Bulgari… 🙂 CT

  • Checo, viôt che là sù cun Brigitta a tu varessis di fâ un cors di "sex in the space" prime. Bepi

  • In efiets Bepi tu âs reson… prime si podarès alenâsi su chel aparechio de NASA che al va jù in colade libare… no? /CT

Lasse une rispueste a Anonimo Cancele rispueste

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di Pagjine dal sît