Il gjat di Riedo

Riedo al zire in motorin, simpri vistût cuntune tute di fabriche, colbac di pêl e mostacjis a ûs il centist DDR Thieme… insome… come un dai Village People, cui mostacjons che i van jù un fregul tal barbuç.
Cul so Garelli al va intune fabriche di vernisadure di elements a tacâju te cjadene (lu clamin “Picje e dispicje” fasint lui dome chel); ogni tant si plate daûr di une tasse di lens e al tire fûr la sô butilie cuadrade tascabile di merlot… Se lu viodin al dîs che al è sirop, ma ducj a fasin fente di no viodilu, o pûr pardabon nissun lu viôt.
Milio, te ostarie al ven a savê di Riedo che un gjat neri i rive simpri in cjase ma nol sa di dulà che al jentre. I pissute pardut e no dome chel. Milio burlon lu spaurìs e i dîs che chê e je la anime di puar Guerino, un cunfinant di Riedo, simpri amion di ostarie, simpri vistût in tute e cun purillo tal cjâf. Riedo si spaurìs… aial di clamâ il predi a benedî? Ma no, Riedo, il gjat al è to amì… e je la anime di chel puar… lassi alc di mangjâ pluistost. 
Riedo i lasse ogni matine une fete di sopresse o une sclise di formadi su la taule. Il gjat al mangje dut, ma al continue a pissutâ chi e là. Je conte a Milio, e chel lu coione in zonte… i dîs se al è çondar a lassâlu mangjâ a sut, pura Guerino.
Riedo al zire in motorin un pôc plui dret. Un sclip di merlot lu lasse su la taule, intun citut in bande dal gustâ par Guerino. No i crôt a Milio, ma il gjat, dut câs, al somee preseâ. 

di Milio dai cjans


4 coments On Il gjat di Riedo

  • Ca la logjiche e varès di sei cussì: o il gjat al è come che al dîs Milio; ven a stai l'anime di Guerino, amion di ostarie di Riedo, o al è dome un gjat neri che a la cjatât bon stâ. Ad ogni mût tant che al gjat come ancje ce che al rapresente (seont Milio) ur plâs il merlot.
    A cui no!!!!

  • Brâf Milio, une vore ben scrite e compliments par vei fât bevi il merlot al gjat. Jo a no ài rivât ancjemò a fai cercjâ il barbera ae me cjanute. Bepi

  • Biele la conte Milio.Ben stimant i lavors de nestre cjare ostarie,lis tos contis a pareli di tantis altris a ripuartin il folklor, la costumance,il mut di vivi da nestre int di ir, specjaliste tal manda fur bocje il ridi cuant nol jere nie di manda dentri.Sacrosant imparà,profondì,le amade lenghe mari, ma o viot altretant necessari scrusìgna sul mut ca viveve cheste int une volte,sol cussi chei di doman podaran cognossi veretat,e che i zovins di vuè no mi disaran plui co jeri un stupid a mangja zuf tre voltes in dì e no nutella. Lussian

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di Pagjine dal sît