La pietât di Gjorgjo

Al cjastiel, cuant che lu vioderin, di lontan, dret sul cjaval blanc, la maravee e montà subite in bulidure e batibui. Dome lui al jere lât vie di sô volontât, par coraç e fede, e no par sante scugne, come i tancj manigolts obleâts di une condane. E dome lui al jere tornât indaûr.
Gjorgjo al vistive une muse dure, cuete dal soreli, ermetiche. L’armadure, cence nancje une sgriade, e jere cuvierte di polvar.
«Lu veiso… lu veiso copât?», a barbotarin i prins, za in zenoglons denant dai çucui de sô bestie.
E lui? Ce podevial dî, lui, di chê risalte vuarbe, mole, pacjifiche, che al veve cjatade daûr a mangjâ grisons, platade in tal umit nereôs dal foran? Podevial migo contâ di une salamandre grandonone, plene di scais e cuars, che no varès fat mâl a di une moscje? O al podevial migo contâ de grote, che e permeteve di scjampâ fin dopo dal desert? E de pietât, par chê bestie rarissime, forsit uniche, podevial forsit contâ?
Al mostrà une sclise di vues, che al veve cjapât sù di par tiere. «O ai vût pietât», al businà cence fermâ il pas dal cjaval. «Cheste e jere une des sôs ongulis».
di Raffaele Serafini

4 coments On La pietât di Gjorgjo

  • Veretât, bisugne tornâ plui spes in Furlanie che di sigûr stan cambiant lis robis. Ancje cheste conte e conferme gnûfs gjenars leteraris (neoclassic?), o miôr un tornâ tai timps, disin di une vore di agns indaûr. Ben scrite, miôr di cussì no si podeve.

  • Nelo, Contecurtârs ve ca ch'a tornin a tacânus. O ài let sui gjornâi di une propueste di leç par tornâ a inneâ la Piçule Patrie dentri tal Trivenit. A sarès la muart de nestre marilenghe! Ce podino fâ par fermâju? Bepi

  • Bepi, pe nestre lenghe, i invasôrs e la politiche no mi fasin pôre. No son chei che e innearan la nestre marilenghe.La innein, invezit, i furlans che la fevelin pôc e no la insegnin ai lôr fîs o nevôts. E chest lu conferme la storie. Di fat ancje se tai secui sin stâts invadûts di dutis lis razis, magari in pôcs ma il furlan ancjemò lu cjacarin.

    Ps. Bepi volès fasti i auguris par Nadâl e se no ti displâs mandimi il to numar di di telefon a ne_llomalis@yahoo.it



  • Chest altri Zorç invezit nol à vût nissune pietât.

    Mandi

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di Pagjine dal sît