Si svee malcuiet, cu la bocje sute, impastade, netantsi i dincj cu la lenghe. La sere indenant, platant la man fassade sot la taule e dentri de manie, al veve glotût la cene in premure e si jere ficjât tal jet, cence nancje doprâ il spacetin. Sô mari e sô pari no si jerin inacuarts di nuie.
La feride lu lambicave: si jere gratât vie la cjar su la schene de man fintremai a cjatâ il vues, ma almancul al jere in fidance che chest colp nol sarès plui cressût.
«Ce âstu li? Al è un pêl! Uuuh, ce ingomut!»
Mariute e je la plui bieline de classe e Michelut si vergogne di murî. Sgnargotant alc dilunc dal ingjustri al scjampe a platâsi, par gjavâlu vie, zemant di fastidi. Cuant jerial saltât fûr? E parcè tant grues e scûr? No ju à nancje, lui, i pêi… Nissun dai siei compagns ju à!
Cuant che al torne tal banc, Gaetan i riduce e lu poche cul comedon. Michelut si rassegne: lu varessin coionât par un pôc. Di ben che s’al jere gjavât subit, al pense, ma la matine dopo il pêl al è di gnûf li. Anzit, no dome un, ma une piçule schirie, e se nol fos impussibil si disarès che a somein un çuf di jerbe, parfin tal colôr. Ju distirpe cun fature, e lis lidrîs, umidis di sanc, a sburtin chel pensîr. La dì dopo a tornin a cressi, e anche chel dopo inmò, simpri plui vivarosis. In ca di une setemane al veve intor une striche di prât.
Stuf, dilunc la ricreazion, al robe un compàs e al sgarfe, supant il sanc, pa no sporcjâ il banc.
Al sflade, intant che al disrodole la fasse, plen di morbin. Sui ôrs, sot dal sanc secjât, si è za fate su un pocje di croste. Michelut al riduce, content, ma al sint come un grop di cjavei in bocje. Al met dentri i dêts, al tocje, al scaturìs. Al dopre il spacetin cun ferocitât, al mastie, al sbreghe vie, cence il coraç di cjalâsi tal spieli e vierzi la bocje.
Cuant che al spude tal lavandin, i fii luncs e verts si pierdin in tal sgurlâ de aghe.
di Rafaêl Serafin
#392
1 comments On Çufs
Usti, se nol fos ben scrit o disarés ch'al é ben vivût.