Kalundborg

Mi sint piçul ta cheste megalopoli dai palaçs a riis, dute plenÆ di silos. O ziri pes stradis e no cjati nissun. No, cjalant ben, alc al è ma a corin vie svelts i piçui eletrons…
Sì, i eletrons a son i unics a vivi ta cheste megalopoli. Se si pues disi che a vivedin…
I circuits eletrics a son lis stradis pes piçulis particulis (no di glesie ma subatomichis).
O sieri il tapon, comedant l’argagn mi sint bulo.
No soi plui piçul ma grant. O met vie la lint di ingrandiment e i struments di precision. La radio cumò e funzione e o saludi chei silos e chei palaçs a riis dulà che a albierghin i eletrons: valvulis, condensatôrs e altris circuits…
O sintonizi l’imprest: UIU UAU UIU UAU UIU UAU a fasin lis ondis. Ondis OM.
La sbarete e passe par Casablanca, Praha 1, Praha 2 e si ferme su
KALUNDBORG
I ABBA a cjantin une cjançon bielonone.
La vecje none le sint e e pense che lis fantatis che a cjantin a sedin in pereson dentri te scjatolete!
“Torne a vierzi il tapon, Denis, e mole lis fantatis!”
di Checo Tam

3 coments On Kalundborg

  • Biele la conte Checo,biei i aparechios in foto, e tante nostalgje dentri me dopo tancj agns a indrecja te vie juste chei eletrons. un di mi à rivat une radio dute smontade,cemut mai? disi io,dute colpe dal nono disè chel altri, a cirii cui platat dentri. Lussian IW3 QRC.

  • Checo, tra me e Lussian, 'ndavin mangjât di pan, letrons, telis di rai e polvar, (e cualchi surisìn) da lis vecjis radios. Setu ancje tu de nestre gjenie?
    Fânus savê.
    Me none Anute, che e jere dal 1876, mi diseve dispés: Paulino, ma sono i omenùs li dentri? E jo ridi.
    Mandi

  • jo o vevi la none che e crodeve che la zingare de La luna nera (chê che e leieve lis cjartis dal 96 viers vot di sere) e jentràs tal sgubulot de television juste a cjase sô (de none): "Par dulà jentrie?" disè… Daspò une altre vecje che e viodeve lis olimpiadis dal nadà si domandave cemût che i omenuts no sclipignavin la lastre dal scherm! (Keko dixit)

Scrîf un coment

This site uses Akismet to reduce spam. Learn how your comment data is processed.

Pît di Pagjine dal sît