Une volte il sut al jere la bestie nere ch’a meteve plui pôre di dut.
Al capitave tra la Madone dal Carmel e chê di Avost; za un cjamp al dave pôc sorc, se e vignive a mancjâ ancje la aghe, il racuelt al leve sù pai stecs, e cussì cence polente i dincj si ju scugnive poiâ su la gratule.
Ma ve chi che e saltave fûr la strolighe inzegnerie di gno nono Cico, lui al diseve che cuantche un nulut si presentave denant soreli a fâi la barbe ai rais, bisugnave sorâlu, cussi al lave a clamâ so pari e sô mari che a vignivin fûr a sdramassânus di aghe.
Par cheste uficiature Cico al adunave ducj i fruts dal curtîl dai Pontons, une sdrume di fruts, jenfri chei ancje jo, e ognidun al veve di vê in man un imprest; cui la forcje, il riscjel, la sesule e vie indenant cul armamentari agricul.
Cun Cico denant, dut gaiôs e gaiart, si veve di cori ator ator dal morâr a mieç curtîl, vosant litaniis dediades, e spacolant i imprescj par ajar.
In chel an le inzegnerie di Cico e à funzionât, il cîl si è cuviert di nûi colôr plomp, lamps e tons a slusivin e sdrondenavin come intun cjamp di vuere, e noaltris fruts si businave di plui par parâ vie la pôre messedant i imprescj viers il cîl.
Lis gjalinis, i dindis e i ocats, che a vevin plui sintiment di nô, a jerin lâts a parâsi ta la arie; Cico denant di ducj al voltolave par aiar un falçut vosenant “Avanti Savoia!” se no che dut un moment un folc al à impiât il morâr dal curtîl come chei che a si dopre a Nadâl! Cussì ancje gno nono cun dute la lame dal falcet, al jere restât impiât e fer, cuntun pit par ajar e chel altri in tiere al someave chês statuis di Passarian.
Noaltris fruts molâts i imprescj e cu la sveltece dal jeur, sin lâts a parâsi te arie dongje cun lis gjalinis, i dindis, i ocats, intant mê none dal balcon dal solâr e faseve cori la corone jenfri i dêts, vosenant “A fulmine tempestade liberânus Domine”.
Cenonè e à tacat a vignì jù tante di chê aghe che e à ancje zovât a distudâ e gjavâ gno nono dal sio stât lapidari, che cun cjapiel e gjachete ancjemò fumant al vignì a parâsi cun nô.
Il mani dal falcet al jere di len, pensait voaltris sa sucedeve agns dopo cuant il progrès lu veve fat di fier!
Dopo chê volte gno nono cuant che al viodeve il nulut a fai la barbe al soreli, si sierave te stale a rodolà (trinciato forte) e cucant pe balconete cun voli di furbo al spietave ch’al passàs.
Miôr cence polente che rustît dal folc!
di Luciano Marinig I W3 QRC
#339
4 comments On Il sut tra lis dôs Madonis
Mandi Luciano,
Biele cheste storie cu la sô simpatiche e frescje inocence. L'om al vûl sfidâ la nature, però jê no reste indaûr, e à lis sôs armis simpri prontis.
Di sigûr il nono Cico al jere un sorevivent di ben altris batais, di li che al berlave "Avanti Savoia", e ancje di li cheste sô riflession: – Miôr cence polente che rustît dal folc! –
Brav!! ma contile drete! La vatu a ciriles ches contes cussi simpatiches ,,doman di buinore quanche si vedin o soi anciemo che o rittt GRANT LUSIAN
Luciano gracie. Cu les tôs contis tu us regalis tocs dal Friûl dai plui smenteât o mai cognossût
Biele, ma soredut legre la tô conte
Luciano, cun ducj chei imprescj e tôs invenzions che tu âs pal curtîl, di sigûr tu âs cjapât ancje tu alc di tô nono.
Bulos ducj doi.
Talis nonus, talis nepotis (Cicerone perdonimi)
Mandi
Pauli