Tal domo di Codroip, a mieze glesie a man çampe, al è un altâr cuntun Crist in crôs dut di ebani, miôr cognossût come il Crist neri.
Chest Crist al compagnave i condanâts cuant che a passavin il Puint dai Suspîrs par lâ tai Plomps a Vignesie, li che a fasevin une brute fin.
Secui indaûr, l’ultin Doge di Vignesie, Daniele Manin, che al veve une cjasute a Passarian, lu regale ae parochie di Codroip, che lu ten une vore di cont e i fâs ancje un altâr.
Plui di cent agns fa, une Istât a Codroip al e un sut di no visâsi a memorie di om. Son plui di trê mês che a no cole une gote di aghe e la campagne e je dute brusade. La puare int, che par plui e vîf cu le agriculture, e je disperade; se la tiere a no bute, plui di cualchidun al morarà di fan.
Si decît di lâ a tabaiâ cul bonsignôr, par viodi se a si pues fâ alc. Lui al dîs ch’al è un cjastì di Diu pa la tristerie de int, ma i contadins i fâsin presint che i frutins che a moraràn di fan, ce pecjâts puedino vê fat? Par contentâju il bonsignôr ur promet che domenie dopomisdì si fasarà une procession, ”Puartarìn il Crist neri” al dîs, ma nol è masse convint sul risultât.
Tal fresc de ostarie, Gusto il sensâr al bêf il so taiut di neri. Gusto al e un maldevot e mangjepredis di prime categorie e al è di une cjativerie uniche. A disin che cuant che sarà le sô ore, nancje il diaul al volarà vêlu, parcè che di sigûr al larà a meti malepâs ancje là jù. Pal mistîr che al fâs, al frecuente cetants marcjâts e ostarîs e al bêf une vore. Cuant che al rive a cjase bevût, se Tunine le sô femine, e olse a dî alc, di sigûr a son botis di vueli sant. Tunine, puare, si viôt dispès dute macolade e jê e dîs simpri che e je colade pes scjalis, ma nissun i crôt.
De puarte vierte, Gusto al viôt dute che sdrume di int, vignî fûr de glesie e i domande a l’ostîr “Dulà vadie dute che int cun cheste canicule, invessit di stâ a cjase tal fresc?”.
“A van in procession cul Crist neri, par fa vignî la ploie” al fâs lui. “Puare int” al fâs Gusto “Ce puedial fâ un toc di len. Al plovarà cuant che al varà di plovi. Che al timp e al cûl, no si comande!”. E al pare jù il so taj.
In procession e je tante di chê int che il cjâf dal corteu al è bielzà rivât a mieç borc grant, cuant che i ultins a jessin de glesie. Le int e pree e e cjante cun dute la vôs che e à tal cuel. Da cjâf lis feminis e van cun “Noi vogliam Diiio, cheee nooostro paaadre….” E da pît i oms cun “Besteeeemie mai piùùù, son taaanti corteeelli al cuooor di Gjesuuu…”.
Poben, e sarà stade la fede o ancje l’interès che dut chel vosarili al rive ni vore adalt, e Diu, mot a compassion, ur mole la aghe. In doi minûts il cîl si fâs scûr e nûi neris a si fasin sù a balons. Forsit ur mole masse e forsit i reste in man il rubinet, ven a stai che a si vierzin lis cataratis e e ven jù il diluvi.
Il bonsignôr cul Crist neri e dut il predessam al rive, a pene in timp, a parâsi sot di un puartic. La int e côr di dutis lis bandis, cirint di lâ a sotet; nissun al veve puartât la ombrene. Pes stradis e cor tante di chê aghe, che e rive a lis canolis. Cui zigant al miracul, cui preant e cui porconant, par vie che al è belzà strafont, la procession si disfe.
Gusto, ancjemò scaturît a viodi dut chel davoi, si volte viers l’ostîr, restât cence peraulis, e cun muse maraveade, i scjampe: “Però! Bulo chel Crist neri” e al pare jù un altri tai.
di Pauli Jacuss (IV3IAN)
#344
4 comments On Il Crist neri
Biele la conte, mi pareve co stevi viodint un film di Don Camilo e che Gusto al jere Peppone. Ancje se i anticlericâi a jerin in mancul, no tu cjatavis e no tu cjatarâs nissun paîs che nol vedi il so.
Brâf Pauli.
Mi plas, parce mi ricuarde usances pierdudes culì tal gno pais, che lungie schirie di int divote in prejere, par domanda o ringrazia events naturai a favor de sopravivence umane. Braf Pauli, las tos contes son tant smicjades su la gneste tiere Lussian. i w 3 q r c
Tu mi âs fât vignî iniment lis rogazions ca si fasevin vie pe campagne e la preiere latine: a peste fame et bello liberanus domine.
Se no vevin puartade l’ombrene forsit no vevin tante fede…