Maruska

Livio al è vedran e al vîf cun sô mari, vedue.
Jessint un biel om al varès ancje vût cualchi buine ocasion, ma a sô mari, forsit par pôre di pierdilu, no i lave mai ben nissune. Cheste no i plâs, chê altre e veve chel, che altre ancjemò e je cjacarade. Insumit, rivât a 45 agns nol à ancjemò vût feminis.
Sô mari e ven a mancja e cumò par Livio forsit al è tart par cjalâsi ator, viodude la etât.
Ven a stâi ca i ven la ocasion di lâ a vore in Russie, par trê mês. Il puest, Murmansk, al è ni vore lontan e cetant frêt, ma la paie e je ne vore buine, cussì al va.
Ta la mense dal cantîr e lavore une biele fantate, Maruska. E a doi vôi di un azul colôr dal cîl, une cjiavelade di bocui colôr da l’aur e di cuarp po no i mancje nuie, ancje masse. A Livio i plâs chê fantate, cussì biele e simpri legre, e cuant che i coments pesants su di jê dai siei compagns di vore a tachin a dai fastidi, al capìs che al sint alc par jê.
Cuant che al torne a cjase le puarte cun sè. Jê e ven vulintîr vie de miserie, ancje se cuntun om plui vecjo di jê di vincj agns.
In Italie, Maruska si cjate subit ni vore ben. Livio a no i fâs mancjâ nuie e la ten come une regjine. Al fâs meti ancje la antene paraboliche, par fâi viodi cualchi program da la Russie.
Cuant che van fûr po, a bracet, lui al è dut braurôs di fa viodi che al à une femine cussì biele.
Maruska e ten ben la cjase e je ancje buine di fa di mangjâ ben, tal jet po son fûc e flamis e Livio al fâs fadie a stâi daûr, pa la diference di etât.
Livio al è in paradîs, però, timp dopo, Maruska e tache a fâsi preâ. Une volte no sta ben, che altre e à mâl di cjâf, ‘naltre volte ancjemò i dûl la schene. Po dopo e tache a vê pretesis. E dîs ca varessin di meti lis robis a puest, ca no jerin ancjemò maridâts. ”Guai une disgracie. I restarès cence nuie” diseve jê “almancul la cjase…”. Livio no si decideve, ancje parcè che tal jet e lave simpri piês.
Une dì, Livio al ven a savê, par câs, che chel putanîr di Tilio l’idraulic, al va dispès a da une sgurladine a lis tubaduris di une siorute bionde.
I monte il suspiet e al domande une ore al paron.
A lis dîs di matine al viôt, di lontan, la camionete di Tilio, dongje cjase sô e al mangje la fuee.
Al glot, e suiantsi une lagrime, al torne a vore.
Il mês dopo Maruska a fâs i agns. Al jere un piès che e veve gole di fa un scjampon a cjata la parintât in Russie, e cussì Livio ai fâs il regâl.
Al jentre intune agjenzie di viaçs e i compre il biliet par Murmansk, e la contente ancjemò une volte.
Il dì de partence la compagne ta l’aeropuart, prometint che al sarès lât a cjoile il mês dopo, che al varès vût feris.
La busse e la strenç fuart e a lunc e forsit si ingrope un pôc. Po jê e partìs.
Livio al spiete che l’aparechio al tachi a svualâ, si zire, si free lis mans e al torne a cjase.
Passin cinc agns e al à ancjemò di lâ a cjoile.

di Pauli Jacuz
#322

7 comments On Maruska

  • Benpo Pauli, ti disarai che di un periodi inca ches Marusçies
    alì e abondin cetant tai gnestris pais, e i idraulics e an un
    da fa mostro a sabora tubaturis.

    Lusian di Varian

  • Come a disi che veve reson la mari!?

  • In ricuart di chei che e àn la femine foreste, e e je lade bèn e bon par lôr ('ndè pôs), e di chei invessit che e an cjapât il tacòn ('ndè tancj).
    A Livio e je lade ancje ben… podeve la piês.

    Pauli Jacuss

  • Al à fat ben! Feminis? Adiudiudiudiu! a àn reson chei furlans che a fasin lôr il mot FASIN BESSOI! Mior vedrans! Uh, malafesì!
    Abate Farìa

  • Jo e Edmondo Dantes, cuant che o jerin presonîrs, o vin simpri fat bessôi e ta chê volte, pal Five Against One, no esistevin ni Caballero ni lis peliculis de la Fenec… e par chel o dîs che al è miôr lassâ pierdi ciertis voltis int che, cu la biele musute par no disi altri, ti mangje planc a planca la cjase o la pension…
    Furtunâts i furlans che a àn cjatât la foreste juste! cualchidun a 'nd è, lu sai e lu ai ancje cognossût…

    O domandi però cui che e je la biele fantate te cuviertine…

    Abate Fària

  • Vere! Vere! Cui ise cheste bionde?
    CT

Leave a reply:

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît