Il videoregjistradôr

Anute di Bertin a i fîs ator pal mont.
Il plui dongje al è in Gjermanie e si fâs viodi pôc, sì e no une volte l’an, e ancje in chê volte di premure.
Anute e à une gole mate di viodi i nevôts e cemût che a vegnin sù e par letare i domande dispès a siò fi cualchi fotografie dai fruts.
Ven a stâi che pal so complean al rive un pac da la Gjermanie de bande di siò fi. Ben, tal pac al è un videoregjistradôr e une cassete cul cine dai fruts. Dute contente Anute, che e je inzegnose e di coce fine, e cîr di tacâlu ma nol è nuie di fâ, lis prove dutis ma nol va.
Anute e clame lis babis dal borc, che di solit a san dut. Ma ancje par lôr però la robe e je masse imberdeade.
Tocje rindisi e clamâ Pauli, il tecnic. Malvulintîr, parcè che il “tecnic” al coste e si lu clame nome cuant ca rive la aghe al cûl.

I jentri in cjase e Anute mi spieghe la cuistion. “Ai parât dentri la spine da l’argagn ta la curint, come che al è scrit tal biliet di gno fi, po dopo ai metût la cassete ta la sô barconete e l’imprest le à glotude ben. Si è piade ancje une lusute ma ta la television no si viôt nuie. Che al sedi di belzà rot?“
Jo i viôt subit che al mancje il cavo di colegament, il CAVO SCART.
“Anute, nol è rot nuie – i dîs jo – Chi al mancje un cavo, bisugne chi us meti il CAVO SCART”.
“A no, pa la monate – e salte sù Anute – no vuei un cavo scart. Jo i pai ce che al è di paiâ, ma ca mi meti un cavo bon”.
Ridint i spieghi che a si clame propit cussì.
I ai metût ce che al jere di meti e le ai contentade, ma vignint vie mi è parût, che su la storie dal cavo scart che al è bon, no sedi stade masse convinte.

di Pauli Jacuss

3 coments On Il videoregjistradôr

  • Pauli plui che biele, disares esilarant ,ançie posto ca toçie il lavor ca tu fasevis.
    continus, continus, altres tos ventures.
    Lusian di Varian

  • Brâf Pauli. E po vares ancje io un mangje cassetis di comedâ. Al è un pies che non lu dopri. Forsit no son robis gravis o fii mangjâs di piantianis,ma tu sês masse lontan.
    Nelodifeagne

  • Di solit, la tecnologie a è simpri serie, anche masse. Bravo Paolo, tu sei rivat a dropà la tecnologie par fa ridi il lettor. (ik3riu)

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di Pagjine dal sît