Micio-Micion

O jeri piçule e o vevi une mame zovine. O vivevi intun anonim palaç di perifarie. Cuant che o levi a zuiâ cui miei amîs spes il nestri puest preferît al jere un prât al cuâl si rivave par un troi di tiere batude. D’Istât chel prât al jere plen di papavars ros, barburicis celescj e paveis di tancj colôrs. Però la vere star dal prât e jere un micion peloson blanc e neri che o viodevin spes mieç platât te jerbe o pûr in moviment cun pas maestôs; par nô al jere il Re dai gjats, il Gjaton, il Micio-Micion. Al sameave che il prât al fos so; chel gjat al jere cussì grues che i frutins plui piçui a ‘nd vevin parfin un pocje di pôre. I nestris sempliçs zûcs a voltis a stiçavin la curiositât dal micion, che, tra une pavee e une lisierte, al veve un divertiment in plui cui nestris scherçs.
Tancj agns a son passâts di chê volte. O soi cressude. O ai vivût in altris puescj. O soi tornade in chel prât parcè che li dongje e je ancjemò la cjase di une vecje agne che o orevi saludâ. Il prât nol samee cambiât: al è Jugn e ven a stâi papavars, barburicis e paveis in bondance. A son passâts tancj agns dai timps de infanzie e pûr…cu la code dal voli a un trat mi è parût di viodi une gruesse sacume blancje e nere che si ficjave dentri de jerbe!
Cussì mi son tornadis iniment lis peraulis dal gno mestri spirituâl: si fâs clamâ Eduart ma in realtât al ven di lontan, de Indie remote. Lui al à simpri sostignût la teorie de reincjarnazion. Cui sa che chel gnûf micion dal prât nol sedi la reincjarnazion dal Re dai gjats di tant timp fa?